داستانۊ شېخی سەنعانی
بەشۊ حەڤڎەهەمۍ
موریدەکۍ شېخی سەنعانی پەی یاوای بە وایەیشان هەر یۊشا ڕێوەشا نیارە، کە ڕزگارکەردەی شېخی سەنعانیەن، بەڵام دماجار خەلیفەکەشا ماچۊ: ئانە کەی فېکرېنۍ شمە کەردېشاوە، هۊرزدۍ با بلمۍ پەی ئەڵقەو زیکریماو لاڵیایۆ خوڎای گۆرەی بەشکووم ڕەحمێ کەرۊن، شېخی بارۊوە سەرو ڕای ڕاسۍ.
خەلیفە واتش: ئینە چە فېکرەن
هۊرېزدۍ وە پا، یە وادەی زېکرەن
وزووئ، تازە کەین، بە ئابی زوڵاڵ
بکەرمۍ نمای خوڎای لایەزاڵ
ئەوسا کوورەی زېکر، بگېرمۍ پەرېش
بەڵکم ببۊ ڕام، شېخی دەروون ڕېش
بەڵکم جە ئەلتاف جەهان ئافەرین
سەنعان باوەرمۍ هەم نە ڕاگەی دین
یاران واتشان؛ هەر ئېدەن سەڵا
پەنا، ببەرمۍ، بە زاتی ئەڵڵا
دەر ساعەت خېزان، گرتشان وزوو
وە ئېخلاسی پاک، بە هەقق کەردەن ڕوو
نیشتەن وە پای زېکر جەرگەی موریدان
کەردەن ستایېش، پادشای سوبحان
جە ناڵەی یاهوو، یاهوو یا مەن هۊ
کززە کەفت، نە جەرگ، سەحراو کەش و کۊ
مەلان گرد یەکجار ئامابېن بە وار
مەدهۊش بین، بە زېکر پادشای جەبار
هەر جانەوەرێ، نەو دەشت و دەردا
خرۊشان، بە تاو، ئامان جە سەردا
تا یاوان، بەلای کوورەی موریدان
سەدەق مەواتەن، بە زاتی سوبحان
خووگان ستېزان، ئامان بە یەلغار
سەرسام بین، جە نام، پادشای غەففار
لەرزان جە هەیبەت، کوورەی زېکرەوە
چەم نیان وە هەم، شین نە فېکرەوە.
[1]