یا ڕەب باز وە حەق یاران یەک ڕەنگ
وەقتێ عزراییل گیان لێم مەکێ تەنگ
نەفەس تەنگ مەیوو وە چاڵ تینیم
ڕووی مەنتق نە چای تەنگنای بینیم
وەقتێ سەکەرات مەرگم ها نە کار
ماچان گیان کەنن تەڵخە وە ئیجبار
تەڵخی سەکەرات، هەم وشار گووڕ
تەنگی، تاریکی، خەمووشیی قوبوور
هووڵ قیامەت، نەفخەی بانگ سوور
ڕووژ وا نەفسا، لە یەومەلنوشوور
سواڵ و جواو نەکەرن چەنەم
فەیزێ ژە فەزلەت ئیحسان کەر وەنە
ئاسان کەر عەزاو یەک شەوەی قەورم
مونکەر پەی سواڵ بکەری سەورم
نەکیر نەکەری نوکتە گیری لێم
وە حەرف ئەعراب تەشخیس نەدەی پێم
ڕەدنویس ڕەد بوو ژە ئینتقامم
ماڵک دووزەخ فەرمووش کێ نامم
پاکا وە حورمەت خاک پای پاکان
خاک پای پاکان ئەولیای خاکان
شاللە شەرارەی دووزەخ نەوینم
ڕەهڕەو بوو بەهەشت بەیوو وە بینم
تورکەمیر نە تورک و نە عەرەولەفزم
کورد کەم سەواد حافزەلحەفزم
ژە جەور ئافات زەمانە مەحوم
هەم خەت ناقابڵ هەم سوخەن سەهوم
یە ئیستدعامەن هەر کەس بخوانوو
پەس سەهو و خەتام ژە وێش نەڕانوو
هەر کەس بخوانوو نەقسێ ژە فەردم
سەهو و خەتا وەم نەکەرن مەردم
#تورکەمیر# [1]