داستانو حەیدەری و سنۊبەرۍ
بەشۍ حۆتەمە
دمای گېڵایێ فرەی، حەیدەر نیگاو دووریش کەرد، سیاماڵێ جە دوور دیارەن، دمای نزیک کۆتەیۆ، سەرەش کېشا چۊوەر، چېشش دی؟
ئېد وات و سەرسام، نیگا کەرد جە دوور
خەیمێ دیارەن، چوون شەمعی کافوور
قەمچی دا بە ئەسپ، دەوەندەی ڕەهوار
تا، یاوا، وەپای خەیمەی زەڕنیگار
سەرکېشا نە تۊی خەیمەی لالە ڕەنگ
دیش شەخسێ، نیشتەن، وېنەی شای فەرەنگ
شەهنشای شش دانگ، فرە نازارەن
سەرتاپا شەریف، دیڎە خومارەن
ئەر سەد، کە وەسفش، نمەبۊ تەمام
بەعزێ مەواچان، باقی وەسەلام
کورپە حەیتەران، چین وەردەی چین چین
ئەفشانەن بە ناز، نە پای عەرەقچین
دوو دەست کەڵانە، ئامان جە سەردا
میقراز بەرکەردەن، نە پای قەمەردا
قاش و ئەبرو خاس سیای شوڕ و شەڕ
پەخشنداز شییەن، دایېم موکەڕەڕ
هەر ڕاویارێ، ئەجەل بۊ مەرگش
تا، پەڕ مەنیشۊ، نە ڕیشەی جەرگش
دیڎەش، چوون ئاهووی خووتەن چڕیدە
وەحشی، هەراسان، سیاوەن دیدە
گۊناش چوون فیردەوسی خالیدینەن
یا بەدری کامڵ، دوو هەفتەمینەن
لەپ، دوڕ، جە یاقووت، کەیلەن جە گەوهەر
پەروەردەن، بە ناز چوون شەهد و شەکەر
بەو تەور نازکەن، وەقتی عیبادەت
لەعلی بەدخشان، مەدۊ بە غارەت
ئەندازێ دارۊ ، زەنەخدانی زەرد
ماچۊ، مەشەکیۊ، قەترەی (ماء الورد)
گەردەن چوون بلوور، پەڕ جە بادەی مەی
چوون مینای بسات، کەیکاوسی کەی
پڕچی ماوی خاڵ، فیروزەی بېگەرد
مەدرەوشان وە بان، چاڵی تین زەرد
دوو لیمۊی پەنهان، نە تۊی جامەدار
مەنمانان، وە تەرح، تەڵای دەس ئەفشار
وەلحاسڵ، ئەو ماه، حۊری سرووشتەن
گوڵەن جە گوڵزار، باخچەی بەهەشتەن
تەک دان، وە پاڵشت، چوون شەمسی خاوەر
سەد ڕەعنا کەنیز، مدران وەرانوەر
نیمچە کەنیزان ناسک نازداران
گردین پەی وېشان، ئەرواح سپاران
جە شاهی پەریان، بەردەن سامشان
هەر یەک، مەنشوورەن، ، بەی تەور نامشان
گوڵئەندام خەمین، گونای گوڵنارش
شەکەر شەرمەسار، شەهدی گوفتارش.[1]