کەتانە خڕە
ئەم ڕووەکە لە دامێنی چیای #کێوەڕەش# دەڕوێت، بەتایبەت شوێنە سێبەر و تەنیشت تەڵاشە بەردە گەورەکان، لەسەر خاکە کەڕوواویەکان، واتە ئەو بەرد و خاکەی ڕادەی شێ و دڵۆپە ئاوەکان، ڕزاندویانە و تیشکی هەتاو بەکەمی دەیگاتێ، ئەم ڕووەکە لەسەر کەڕوو، خاکی شێدار دەڕوێت، باڵایەکی وردیلەی قەبارە بچوکی هەیە، لەشاخی کێوەڕەش و ناوچەی دۆڵی #سەرکەپکان#، باڵای لە (15 سانتیمەتر) تێپەڕ ناکات، چەند لاسکێکی ناسکی لێدەبێتەوە، بەره و سەرەوە هەڵزناوە، گەڵاکانی خەپلەی ورد و بچوک و سەربەسەرن، قەبارەیان لە (1) سانتیمەتر تێپەڕ ناکات، قەدێکی ڕەنگ قاوەیی شێوە دەرزيلەيی هەیە، ڕەنگی گوڵەکانی سپی شيریيە و چوار پەلکەیە، له مانگی ڕەشەمێ، سەرەتای شوبات چرۆ دەکات و لە مانگی گوڵان، ناوەڕاستی نیسان قەد و گوڵ دەکات، حەز بەخاکی نەرم و شێدار دەکات، تا ڕێژەی ئاو و ترشەڵۆک له خاکەدا زۆرتر بێت ئەویش تەمەنی درێژتر دەبێت، لەگەڵ هاتنی گەرمای هاوین و وشک بونەوەی خاک تەمەنی ئەم ڕووەکەش بەرەو ئاوابوون دەچێت و وشک دەبێت، له ناوچەی #پڵینگان#، دۆڵی سەرکەپکان له هەندێ شوێن دەبینرێت بەڵام هێنده کورتەبنەن لەگەڵ گیاکانی تر تێکەڵ دەبن و ئەگەر زۆر به باشی لێیان ورد نەبیتەوە بە باشی ناناسرێتەوە لەڕووی پزیشکییەوە گوڵەکانی بکوڵێنرێت، لەگەڵ گوڵی هێرۆدا بۆ دەرکردنی دومەل (قونێر) وبرینی چرک دار (هە وکراو) دەری دەکات و ساڕێژ دەبێت.[1]