داستانو حەیدەری و سنۊبەرۍ
بەشۍ نۊهەمە
سنۊبەرەیچ وەختێ حەیدەر بەگش دی بە سواری ئەسپی ڕەخشیۆ، کە گەنجێ زەریفەن، ویس ساڵېش نەتەمامنان، واتش بە کەنیزەکەکاش سیایانێش پەی ڕازندێ بە فەرشی جوان و قلیانی و قاوەش پەی بەردۍ، حەیدەر بەگ لوا دلۍ سیاماڵی، کۆتۍ خزمەت کەردەیش:
سەرانسەر، دییا، ئەو ماهی تابان
وات: بە کەنزان، ماهی زەڕنیشان
دیارەن، بوزورگ، عەزیموششانەن
عیزەت واجیبەن، چونکە مېهمانەن
پیادەکەن جە ئەسپ، جەوانی هەنی
فەرش کەن، پەی مېمان، خەیمەی سەهەنیی
چەنی موتەکای زەڕین بوومی زەر
پەرێ، تەکیەگای شېری دلاوەر
قلیان و قاوە، ببەردۍ پەرېش
نەخچیریش کەردەن، گیانش بیەن ڕېش
شیرین بەتەعجیل، فەرش وست نە وەر
وات: بە حەیدەر بەگ، ئەی شېری سەروەر
شیرینم، کەنیز، بانووی بانوان
بانووی بانوان، پاسەش فەرماوان
کەرەم کەر، جوان پیادە بەر جە زین
ئەمشەو مېهمانەن بە، بفەرما زەمین
حەیدەر بەگ بەناز، پیادە بی جە ڕەخش
لووا نیشت وە بان، فەرشی مونەققەش
ئاوەردەن، پەرېش، قلیان و قاوە
کەنیزان، جە لاش، مدران وە پاوە
خوان حازر بیی، توحفەی دڵپەزیر
کیانا، پەرېش، شازادەی کشمیر
حەیدەر بەگ کېشا دەست نە ڕووی تەعام
بواردش تەعام، ئاڵای عەنبەرفام
دەست کېشا وە خوان، زیبای بوومی بەر
شوکری یەزدانش، بە حەساب ئاوەر
دەست کېشا وە خوان، زیبای بوومی بەر
شوکری یەزدانش، بە حەساب ئاوەر
دەست کېشا بە خوان، (ماء الورد)ەوە
شەو ئاما، بە ناو، خاوش بەردەوە
دەستی ڕەخت و خاب زېبای بۊ عەبیر
کیانا پەرېش، شازادەی کشمیر
شی نە جامەی خاب، عەنبەر بۊی دڵبەر
ڕاحەت بیی بەناز، تاوە سووب سەحەر.[1]