داستانۊ حەیدەری و سنۊبەرۍ
بەشۍ دەهەمە
سەحەر، حەیدەر بەگ جە خاو هۊرئېزا، خوانی تازەشان پەی بەرد، دمای نانو ساعبی سنۊبەرە حۆڎسەڎ تومەنۍ زەڕش پەی کیاست پەی ڕێش.
سەحەر هۊرئېزا، جە خاوی شیرین
بەرئاما، نەتۊی جامەی عەنبەرین
وزووء تازە کەرد، بە ئاوی زەڵاڵ
کەردش ستایېش، دانای زولجەلال
سنۊبەر، خوانی حەقق شەریف کەردە
کیانا پەرېش، هەم جە تۊی پەردە
حەیدەر بەگ، وە ناز، وە بۍ مدارا
دەست کېشا وە خوان، پەی دەفعی سارا
دوعای سفرەش دا، پەی ماهی تابان
ئاواردەن پەرېش، کەنیزان قلیان
وات: بە سەمەنبەر ماهی مونەووەر
ببەر پەی مېهمان، هەفسەڎ تومەن زەڕ
واچە: کیاستەن، بانووی بانووان
پەرێ خەرجی ڕات، ئەی نەوڕەسی جوان
میهمان بیت ئەمشەو، بە شای سنۊبەر
پایەندازت کەرد، هەفسەد تومەن زەڕ
عوزر و تەقسیرات، بۍ حەد فراوان
بوازە بە شاد، بکەرەش ڕەوان
سەمەنبەر دەردەم بە تەعجیل و تاو
خوانش بەر ئەوەرد، زەڕش کەرد بە ناو
بەرد پەی حەیدەر بەگ نیاش بەزەمین
کەردش تەوازوع، بە لەفزی شیرین
واتش: ئەی جوان، ڕەشیدی سەروەر
سڵامت کیاستەن، ماهی سنۊبەر
هەفسەد تومەن زەڕ، پەی خەرجی ڕات بۊ
تەوفیق، ڕەفیقی، پەشت و پەنات بۊ.
مېهمان عەزیزەن جە لای خوڎاوەند
عوزر و تەقسیرات، بەندەی حاجەت مەند
هەر ئېد حازرەن، بشۊ بە ڕاهدا
هەرچی کەمیشەن، پا بنیە پېدا.[1]