مەیموونە خاتوون شیرین دڵکێش
ڕوو کەرد بە مەسکەن موڵک بابوی وێش
تا وە سێ سەعات زیاتەر یا کەم
یاوا بە مەسکەن گوڵستان ئیرەم
وەقت غوروب بی، تاریک ئیوار
داخڵ بی وە تۆی قەسر زەڕنیگار
چون باز تەڕڵان قۆشخانەی شاهی
نیشت وە بان یاتاخ بە دڵروباهی
پیر و پیرزادە زاناشان خەبەر
ئامان وە پێشواز شۆخ خاترتەڕ
گیان و تەن کەردن وە پایەندازش
چون ڕۆح ڕەوان مەکێشان نازش
زەڕئەفشان کەردن جەقەوم و جە خوێش
شاد بی بە دیدار کەنیزان وێش
پەی شاه بابۆ خەوەر بەردشان
جە کار فەرزەند حاڵی کەردشان
هۆرێزا جە تەخت شاه ئەرجومەند
بەتاو و تەعجیل شی وەلای فەرزەند
بۆ نیا وەبۆش هەتاکە تاوا
جە شەوق دیدار چون گوڵ شکاوا
واتش ئەی فەرزەند نوور دنیا و دین
چون نەجاتت بی جە دەست لەعین
واتش ئەی بابۆ پادشای سەروەر
یەک نەوجەوانێ شێر دڵاوەر
ساحیب یاڵ و باڵ شێر غوڕینەن
فەرزەند عەزیز پادشای چینەن
بە باهۆ چون بەور ڕوستەم داستان
جەماڵ چون خوسرەو شاه سەرمەستان
عەلقەم فەوت کەردش جەرووی دەریا بار
قەسر سولەیمان کەردش یەختەسار
هەم دەلغەم دێو بەزاری و عەزاب
قەسر دڵگوشاد ئەو کەردش خەراب
* تەلیسم زەنگۆڵە کەس پێ نەبەرد چار
جەزیرەی واق واق زەنگی ئادەمخوار
هەقت تەلیسم سەخت زەنگۆڵەی ناپاک
بەزۆر بازوو یەکسەر کەردش خاک
من چەنی نازار شای نۆش ئافەرین
بەر ئاوەرد نەچای عەلقەم بێ دین
یەکسەر گوزارش خاتوونە نازار
یاونا بەعەرز جەلای شەهریار
شاه ئەز نەدیدە عاشق بی بەرووش
بە یەقین دڵ کەردش ئارەزووش
من بەو گشت سپا شکەستم وەردەن
ئەو تەنها سوار ئەی فەتحە کەردەن
واجیبەن پەی من بکێشووم نازش
دوو فەرسەنگ یبشین هەم وە پێشوازش
مەیموونە خاتوون شیرین نازار
وات قەسەم بە تاج جوقەی شەهریار
وێنەی ئەو جەوان شێر یەگانە
نییەن جە ڕووی عەرز دەورەی زەمانە
لایەقەن شاهان جەهان بێ گەزاف
بەندەی دەرگاش بۆ جەقاف تابە قاف
شا فەرما دوو تەخت موهەیا کەردن
دەرساعەت پەی شاه و وەزیر ئاوەردن
نەکەردن مدار قەترە دان بە تاو
یاوان بەدەریا بەکەنار ئاو
وەختێ کە دیشان شازادەی چالاک
هاوەپشت مورغ چون شێر بێ باک
#خانای قوبادی# [1]