جە دەمای یەک ماه شای بوڵەند ئەختەر
کەفت نەتەدارەک عەرووسی دوڵبەر
«مەساف» یەکسەر ڕەعیەت ئیلات
خەرج هەفت ساڵە هۆرگرت نە وڵات
بەندیان جە بەند تەمام ڕەها کەرد
ئەسیران بەدەست وارێسان سپەرد
جە ساعەت سەعد یەوم موبارەک
پەرێ شازادە کەفت نەتەدارەک
شێر دڵاوەر فەرهەنگ تەڵەب کەرد
واتش عەزیز و ڕەفیق چوڵگەرد
ئیمشەو بەدەوان تا سفیدە دەم
بشۆ بە مەکان گوڵ باغچەی ئیرەم
خاتوونەی پەری باوەر بەلای من
مەڵهەم زامان دارووی شەفای من
تۆ جە تەنخوای من دەستش ببووسی
واچە وە بێ تۆ تەڵخەن عەرووسی
قەدەم ڕەنجان کەر شای شێر دەماغم
بێ شەوقەن بێ تۆ شوعلەی چراغم
ساکە ئێد شنەفت فەرهەنگ توند خێز
وێنەی تیر نەمەوج کەمان کەرد گورێز
قورب سێ ساعەت بێ زیاد و کەم
یاوا بە مەنزڵ گوڵستان ئیرەم
سوجدە بەرد بەرووی خاتوونەی دوڵبەر
حاڵی کەرد ڕازان شازادەی سەروەر
وەختێ کە ئەژنی خاتوونەی دڵکێش
چەنی چەند پەری نیشت وە تەخت وێش
هۆرگرتن دێوان تەخت زەڕنیگار
خاتوونە جە پوشت دێوان بی سوار
یاوا بە خدمەت شازادەی سەروەر
سەلام کەرد بەڕووی دوڵبەر سەفدەر
شی نەتۆی حەرەم شۆخ نازەنین
بەدیدار پاک شای نۆش ئافەرین
هۆرێزا وە پا شی وە پێشوازش
هەر دوو دیدەی وێش وە پایەندازش
نیشتن بەدڵشاد تا بەوەعدەی شام
شام ئاوەردن، ساقی و بادە و جام
تا بە سفیدە مەجلیس نەکار بی
دەنگ نۆشای نۆش بادەی گوڵنار بی
ئەوشەو خاتوونە شۆخ لەباتە
نەزەر کەردە بێ وەبێ مەشاتە
تەرتیب دا خاڵان بەدر کەماڵش
هەزار وێنە کەرد بەدر جەماڵش
بە پەرداخت باڵاش بەو ئاڵا سازا
هەزار گوڵ بەبەرگ ڕەنگاڕەنگ ڕازا
بەی تەورە کەردش باڵای نەوبەهار
مەنمانا جە ڕەنگ تاوس نە گوڵزار
ئەبرووان خەتات قەترانیی پەیوەست
سیوا کەرد نەدەور نەرگسان مەست
دوو دیدەی سێوەنگ خواب ئاڵووی مەخموور
سیا کەرد بە گەرد تووتیای کۆی توور
«دانە ئەندامش دانەی خەزێنە
ڕازا بە تەرتیب سەد هەزار وێنە»
* بەس تەرکیو شۆخی و شۆخ خاتر تەڕ
بەناز ئاوەردش بەڕووی تەخت زەڕ
شەمع دڵئەفرووز مەشعەلان هەزار
ڕەوشەن کەردشان جە سەرای گوڵزار
سێ هەزار پەری چون تاوس باغ
گرتن نەرووی کەف مەشعەل و چراغ
بەڕووی هەواوە مدران سەف بە سەف
وێنەی مەشعەلدار چرای شەو بەکەف
* شا بە وەزیران کەردش ئیشارە
ئەکابێر خێزا جە هەر کەنارە
شازادەی چینی بە حەرەم بەردن
داخڵ بە خەڵوەت نازەنین کەردن
یاوا بە پای تەخت شای حۆری لەقا
جەمین مەنمانا وێنەی قورس ما
هۆرێزا وە پا شیرین دڵکێش
شازادە بەردش بەهەم زانووی وێش
پەیاپەی بۆسا گوڵ گۆنای ڕەندش
مەنۆشا سەربەست جە حەڵقەی قەندش
جەودما فەرما جە بادەی گوڵنار
ئاوەردن موترێب ساقی نەرووی کار
مەجلیسی ئاراست ئەو شەو وە بێ غەم
مەر بەزم خوسرەو یا جەمشید جەم
مەیموونە خاتوون، پەری گشت یەکسەر
بەڕووی هەواوە سەیرشان مەکەر
تا بە شەبەق ڕۆ بە شادمانی
مەشغووڵ عەیش بین بە کامەرانی
سەحەر هۆرێزان بە مەقسوود دڵ
مەرام و مەتڵەب تەمام بی حاسڵ
شازادەی چینی بە خاتر گوشاد
حەسبولرەزای وێش یاوا بە موراد
بەکامەرانی مەیل بەعەیش و نۆش
جە وەسوەسەی شەڕ دەوران فەرامۆش
بە شەوق و شادی بەدەماغ دڵ
دەم بەخەندەوە مەشکاوا چون گوڵ
بە ئارەزووی وێش بە خاترخواهی
شی وە بارەگای دیوان شاهی
چەنی جەهانگیر بە فیرووزیی بەخت
هەر دوو بەدڵشاد نیشتن وە بان تەخت
شا فەرما شوکرم بەدانای داوەر
شاد بیم بەدیدار فەرزەند دوڵبەر
هەم شازادە چین بەور بێ ئەندێش
سکەی نیکنامی ژ ەندش پەرێ وێش
نام دلێریش مەنشوور بی نە عام
بی بە نەسیبش سەروی دڵارام
#خانای قوبادی# [1]