داستانۊ حەیدەری و سنۊبەرۍ
بەشۍ چواردەهەمە
گفتۊگو میانو (حەیدەری و سنۊبەرۍ) دەسپەنەکەرۊن، سنۊبەرە ماچۊ: تۊ چ هەرزەکارێ بېئەقڵەنی، دیارەن سەردا و گەرمات نەڎیەن ئەپاسە بېپەروا وەراوەرو شازادێوە پېسە منۆ مدری.
حەیدەر پەیتواچش داوە: من ئامانا پېسە غوڵامێ وەردەمتەنە کەوتەنا، من بریندارەنا بە عەشق و تۊ، ئانە سەرەو من و ئانەیچ شیرو تۊ.
وات، بە حەیدەر بەگ، ئەی مەستی مەدهۊش
هەقتە سا نمەک کەردی فەرامۊش
ئارۊ جە دەستم، چوون مەبیی خەلاس
مەبۊ، پارەت کەم، بە تېغی ئەڵماس
پاسە مەزانوو، مەبۊ شکارت
شکارت کەروو بە زەهری مارت
بکەرووت وە پەند، واتەی ئەمیران
عاقڵ بی پەرێ، پادشای ئێران
من پاسەم زانا، مەردی مېهمانی
نەزانام، جە نەسڵ هەرزەکارانی
بەڵام خۊ هەقتەن، نەداری تاوان
هېمای سەرد و گەرم پەنەت نە یاوان
حەیدەر بەگ ، واتش: ئەی ماهی تابان
ماچان، حەرامەن جەنگ چەنی مېهمان
وات وەس بېجا کەر، ئەی نووری دیدەم
سەڵوات دەر بە وېت، ئەی بەر گوزیدەم
باز، هەم حەیدەر بەگ، ئاما بە زبان
وات: ئەی سنۊبەر بینایی چەمان
ئەرسەد جە شېران، پایتەختی شاهم
لاکېن جە لای تۊ، هەر خاک زاناهم
جە خەشمی لارت نەداروو ئەندېش
ئەر تېخ مەشانی، سەر مەدەو نە ڕېش
تا وە تېغی ناز، شەهیدم کەریی
بوون وە سەرگەردت، چونکە دولبەری
من بە غوڵامیت، ئیقرارم کەردەن
ئارۊ تېغی ناز، پېکەم وە گەردەن
تەنیا عاشقەن، عېشقش ها نە سەر
چە پەروا دارۊ، جە تېغی دولبەر
بەڵام قەبېحەن ئەی ماهی تابان
خواجە کەرۊ جەنگ، چەنی غوڵامان
قار و قین وەسېن، دشمان مەدەر پېم
پەشیمان مەبیی، بزانە من کېم
ئەر سەد بېمەیلیی، خڎۍ و کارتەن
حەیفم پەی لەبان شەکەر بارتەن.
[1]