داستانو حەیدەری و سنۊبەرۍ
بەشۍ هەژدەهەمە
هومەیلا، کەنیزەکۍ سنۊبەرۍ، بە تەعجیل یاوا سەرو حەیدەر بەگی، زامەکەش تیمار کەرد، ڕوومەتشەرە ماڵاش، تاکو هۊشش ئاماوە.
کەنیز هۊرگېڵا، چوون بادی زەلان
یاوا، بە خزمەت، ئەفتادەی مەیدان
هەرچی فەرمابۍ، بانووی بانوان
کەردش موهەییا، بە دیڎە و بە گیان
تا کە نە کەردام، بە هوون غەڵتانت
گیانی شیرینم، باڵا گەردانت
فیدات بام، ئەرسەد ناڵانیم کەردەن
مەبۊ جە تەقسیر، نادان ویەردەن
تاقیکەر پەرېم، نام و نیشانش
زوو باوەر پەرېم، جاه و مەکانش
هەرچی مەواچۊ، ئەعلام کەر بە لام
ئەحواڵش باوەر، وە سەرگەردش بام
کەنیز هۊرگېڵا، چوون بادی زلان
یاوا بە خزمەت، ئوفتادەی مەیدان
هەرچی فەرمابۍ، بانووی بانوان
کەردش موهەییا، بە دیڎە و بە گیان
نیشت وە سەرینش، دەست ماڵا نە ڕووش
هەتا حەیدەر بەگ، ئاوەردش بە هۊش
سڵام دا پەنەش، مدرا، وەرانوەر
ئاما، وە گوفتار، شېری دلاوەر
واتش: ئەی کەنیز شیرینتەر جە گیان
پەنەم واچە، ئەسڵ سەوڵی خەرامان
ئەسڵش چە کەسەن، مەکانش کامەن
بەنی ئادەمەن، یا پەری سامەن
تورکەن، تەتەرەن، یا پەری سامەن
دیڎەش فیتنەی بسات، تەمامی عامەن
یا سەردەلیلی، ئاهووی تەتارەن
یام شیرینی شۊخ، شای ئەرمەن شارەن
یا گوڕی بېڕام، تەرسای فەرهەنگەن
یا هەر وەیفرۊش، مایېل وە جەنگەن
ئی شېوە، شېوەی بەشەر نمەبۊ
بەشەر وەیفرۊش، وە شەڕ نمەبۊ
[1]