داستانو حەیدەری و سنۊبەرۍ
بەشۍ ویسەمە
حەیدەر بەگ وەختێ پېخامەکەو سنۊبەرېش ئەژنی، جە چەمانش هەرسی مەوارێ، ئیتر پی جۊرە نام و نیشانو وېش عەرزو هومەیلێ کەرد:
حەیدەر بەگ ئەژنی، کېشا ئاهی سەرد
جە دیڎە ڕېزا، قەترەی مائولوەرد
واتش: حەیدەر، مەواچان نامم
شاری ئەسفەهان بېیەن مەقامم
ئەسڵم قزڵباش؛ نەوەی کەیانیم
غوڵامی ئېخلاس، شاهی ئێرانیم
بەڵام ئەی کەنیز، واچە بە دوڵبەر
دیوانمان کەفتەن، بە فەردای مەحشەر
من هوونم نەکەرد بیم وە مېهمانت
بېجام کەرد واردم، پارچەی جە نانت
قیمەتی نانت وە من بسانای
من، وە سەرکۊنەی عالەم، نەوانای
نەبام بە سەرژان، جەرگەی ئەمیران
چېش بڎەم جواب، پادشای ئێران
زامێ دای وەنەم، نە ڕووی قاروقین
یام دڵئازاری، دایېم خومەت بین
هەرکەسێ نازار شۊخ و شەنگ مەبۊ
بېپەروا و بېڕەحم، دڵ جە سەنگ مەبۊ
یام هەرگیز کینا و عەشقت نەوانان
قاعیدەی قانوون، عیففەت نەزانان
ئاخر چن یاران، حۊری سرووشتەن
کەس داخداری وېش، وەی حاڵ نەکۊشتەن.
[1]