داستانو حەیدەری و سنۊبەرۍ
بەشۍ ویس و دوەمە
هومەیلا گېڵاوە و ئەرزوحاڵو حەیدەریش بە سنۊبەرۍ یاونا، سنۊبەرەیچ بە هاوار و ناڵە، ڕوومەت و قژ ڕووتنایۆ، بە پیاڎە وېش ئۆ ماواو حەیدەری یاونا.
یاوا بە پاپۊش، زیبای سنۊبەر
عەرزکەرد شەرحی حاڵ، گوفتاری حەیدەر
سنۊبەر ئەژنی، دەست کەرد بە زاریی
تاقەت پېش نەمەن، جە بېقەراری
ئاهی سەرد کېشا، نە هېجرانی یار
نە جەولانی ناز، پیادە بی، بە وار
شەدەی مرواری جە سەر شەندەوە
کورپەی حەیتەران، یەک یەک کەندەوە
یەخەی جەواهېر، دڕی تا بە وار
ئاڵان بە هەمدا، سوپای سېیامار
سوورەت بە ناخوون، جەدوەلکاریی کەرد
پەرێ ناو مەمان، هوونش جاری کەرد
سېیاو ڕېحانان بڕیی جە گوڵزار
پەیاپەی مەکەند، مەڕېزا بە وار
ئامان وە هەمدا، جەرگەی کەنیزان
نەوتوول، نەوغەزاڵ، خاتر عەزیزان
وە ڕووی نازەوە، بۊسان دەست و پاش
بە سەڎ نەزاکەت، مەکەردەن، مەناش
وات بە کەنیزان، ماهی مونەوەر
بازدۍ گیانو وېم، بکېشوو وە بەر
دنیام پەی ئېدەن، حەیدەر بەگ لېشەن
دووربای ئەو نەبۊ، دنیام پەی چېشەن
نەبی تاوانش، من بیی تاوانم
کاشکی بکەفتای، شین وە باوانم
ئەی شۊخی شەنگە، بەرزە نەمامەن
ئەی ڕۊخساری پاک، شیرین ئەڼامەن
ئەی دیڎەی خومار، بۍ بادە مەستەن
ئەی تیری غەمزە، کەس جۍ نەڕەستەن
ئەی تەرتیبی خاڵ، زوڵفی بۊی عەنبەر
ئیتر پەی کېمەن، جە دمای حەیدەر.
[1]