داستانۊ حەیدەری و سنۊبەرۍ
بەشۍسی و یەکەمە
حەیدەر بەگ دمای خوڵکەو پیا پیرەکەی پەی یانەو وېشا، لوا نیشت وە بانی سەرین. حەیدەر هەواڵو پیرەژەنەو یانەکەیش وەنە پەرسا، پیرەپیای ساحېب یانە وەڵامش داوە: پیرەژەنەکۍچېگە نیەنە، بەڵام کناچەکېم ئینا خزمەتتەنە.
حەیدەر لوا نیشت، وە بانی سەرین
کۊنە، وات پەنەش، بە لەفزی شیرین:
وەش ئامای وە خەیر، ئەی شېری سەروەر
دڵ، بدەر بە عەرز، کەمینەی کەمتەر
عەرزی تەقسیرات، دایەت مەنزوورەن
مەبۊ، ڕاهیی بوون، کارم زەروورەن
کناچېم چېگەن، پەرێ کەنیزت
خزمەتکاری تۊن، نۊڕەس عەزیزت
ئېد وات لوا، وېنەی گورگی گەڕ
ڕوو کەرد وە بارگەی قەسری سنۊبەر
حەیدەر مەن وە جا، چەنی باری دەرد
بە تاو مەکېشا، هەناسانی سەرد
واتش بە کناچۍ، بانووی بانوان
دایەت وە تەعجیل، واچە کۊ لوان؟
واتش: ئەی جوان، ڕەشیدی سەروەر
دایەم، دایانەن، بە ماهی ئەنوەر
خەریکەن چەنی ئەساسەی شاڎیی
ها نە کارسازیی بەزمی دامادیی
تەعجیلشانەن، کارشان زەروورەن
پەوکەی جە خزمەت، جەنابت دوورەن
منیچ کەنیزی ئېستادەی خزمەت
هەرچی مەواچی، بە گیانم مننەت
[1]