داستانۊ حەیدەری و سنۊبەرۍ
بەشۍ سی و چوارەمە
حەیدەر بەگ دەردە دڵیۍ وېش پەی پیرەژەنەکۍ کەردۍ، دمای ئانەی پیرەژەنەکۍ پەنە وات تەرسیت نەبۊ، چېش ئینا دڵتەنە بەیانش کەرە.
حەیدەربەگ واتش: ئەی یاری غەمخوار
مەتەرسوون واچوو، ببۊ ئاشکار
واتش: مەتەرسە، بە عەونی باریی
ڕازت، جە لای من، نمەبۊ جاریی
فریۍ ڕازانم پەنهانی کەردەن
فریۍ ناکامم وە کام سپەردەن
چڼ نەوڕەسانم بە ناز لاونان
چڼ دەردەدارم، بە کام یاونان
فەرهاد جە مەکرم، ئاوارەی توونەن
هېمای وە تەمای، وەسڵی شیرینەن
زەڕێ جە مەکرم، باوەرو بە کار
قەمەر جە ئاسمان، ماوەروون بە وار
ئەر گرفتاری شازادەی پەریت
مایېل وە دیدار، زوهرە و موشتەریت
ئینشەڵڵا، ڕەحمان، وە بۍ وەسیلە
ماوەرووش پەرېت، بە مەکر و حیلە
بواچە ڕازت، بزانوو چېشەن
مەعلوومەن، جە عېشق، موشکڵێ پېشەن
[1]