داستانۊ حەیدەری و سنۊبەرۍ
بەشۍ سی و پەنجەمە
حەیدەر بەگ ئا وەرمە کە بە سنۊبەرېوە دیەبېش، پەی پیرەژەنەکېش گېڵناوە.
حەیدەر بەگ ئەژنی، ئاما بە گوفتار
واتش: ئەی دایە، ماهی جەهاندار
دەخیلم دایان، بەشقی پېغەمبەر
شەوێ دیم، نە خاو باڵای سنۊبەر
ئاما وە خاوم، بە سەڎ نەزاکەت
بەو لەهجەی شیرین، مەحبووب و شەوکەت
چوون شوعلەی ئایېر، دا وە لامەوە
دڵ بیی، دانەی خاڵ، بیی وە دامەوە
واتش: ئەی هەژار دەروون پەڕ جە دەرد
هۊرېزە، جە خاو نازدارت ویەرد
چەوساوە قیبلەم، ئامان نە خاوم
نەمەندەن ئارام، تەوانا و تاوم
نە بە ڕۊ قەرار، نە شەو خاوم هەن
پەی دېیەن دڵدار، گلاراومەن
ئەرجووم هەر ئېدەن، بوینوون باڵاش
بوینوون بە تۊپ، زوڵفانی تاتاش
بەڵکم ساکن بۊ، دڵەی سەڎ پارەم
چڼ وەختەن پەرېش، جە زەید ئاوارەم
کەس نەبی کەرۊم مەعالەجەی دەرد
تا قېسمەت ئېم شەو وەلای تۊم ئاوەرد
دەخیلم دایان، شای مودبېر ناسان
جە موڵکی کشمیر هەرتۊم شناسان
دیارەن، حەکیم، حاڵی دەردەنی
چڼ دەردەداران، دەوا کەردەنی
مەبۊ، تۊ جە ڕای بەندە نەوازیی
کارێ پەی بەندەی هەژار، بسازیی
بیاوە، بە داڎ بەندەی دەردەمەند
فرە سەوابەن، جە لای خوڎاوەند
ئەرجووم هەر ئېدەن، موشکڵێ پېشەن
دەردم هەر ئېدەن، سەڵای تۊ چېشەن
[1]