داستانۊ حەیدەری و سنۊبەرۍ
بەشۍ سی و ششەمە
گفتوگۊو میانو پیرەژەنۍ و حەیدەر بەگی:
دایە زەردش بەرد، واتش: ئەی حەیدەر
هەرچی مەواچی، ویانە ماوەر
تۊ ئەو کەسەنی، ئەی شېری سەفدەر
جەنگت کەرد چەنی، ماهی سنۊبەر
دیارەن، نیشان زامی دیاریت
مەدرەوشۊ وە بان، گۊنای گوڵناریت
مەزانوو، ئېم ساڵ، نە موڵکی ئێران
مایېل بیت بە دېیەن، ئەو ماهی تابان
عاشېق بیت، وە بەژن، باڵای نەمامش
بیت وە گرفتار، گونای گوڵنامش
پەشېو کەردەنی، زوڵفی شامارش
سەرسامی جە شەوق، دیڎەی خومارش
قەرارت بڕیان، جە بېقەراریی
پەی کۍ مەڕېژی، ئەسری مرواریی
حەیدەر وات، دایە، مەپەرسە چەنیم
با وېم بزانوون، چەنی بەختی وېم
دەردم مەدېونە، زامم کاریەن
دەرمانی دەردم، نادیارییەن
دایە وات: حەیدەر بنیشە بە شاڎ
سەحەر من مەشوو، هەرچی بادا باڎ
حەیدەر سەڎ تومەن، دا بە مزگانی
واتش: ئەی دایە، سا وېت مەزانی
[1]