داستانۊ حەیدەری و سنۊبەرۍ
بەشۍ سی و هەشتەمە
دایە (پیرەژەنەکۍ) دمای ئانەی کە ئۆ لاو سنۊبەرۍ یاوا، کەوتە تاریفدای کەسێ کە حەیدەر بەگەن:
ئارۊ، پەی سەودا، لوام بە بازار
جە ئێران، ئامان، یەک خواجە توجار
توجاری پەڕ ماڵ، ساحېب کەماڵێ
جوانێ نازدارێ، پەڕ خەت و خاڵێ
سەرتاپا زەریف، بوزۊرگ زادەیێ
پەڕ عەقڵ و پەڕ هۊش، هېما، سادەیێ
کاکۊڵ موشکی ناف، ئاهووی تاتاران
زوڵفان، عەنبەر بار، نادرەی شاران
چین چین چەم وەردەن، چوون تووڵی لاولاو
کرژەن، چوون کڵاف، یام خەیاتەی خاو
ئەفشانەن، نە دەور کڵاو قازاخی
گەردەن چوون مینای، میهری نوشباخی
باڵاش چوون شمشاڎ، ڕاژەی خەسرەویی
شان و شەوکەت خاس، بازوو پالەوی
گۊناش مەدرەوشۊ، چوون شەمسی خاوەر
پاسە دېیارەن، عېشقش ها نە سەر
خۆزگە بەو نازار، ئەو خەمخوارش بۊ
دنیاش بە کامەن، هەر کەس یارش بۊ
کەسێ عاشق بۊ، بەو جۊر جوانیی
عومرش بوېیەرۊ، بە کامەرانیی
نەک وە جەستەی من، زار و بیمار بۊ
وەک دېو گرفتار، مەحرووم جە یار بۊ.
[1]