داستانۊ حەیدەری و سنۊبەرۍ
بەشۍ چلهەمە
سنۊبەرە وەختێ پارچە شەدەکەش هۊرگېرت، فکرش لوا پەی لاو حەیدەری، چونکم ئا پارچە شەدە یاڎگاری وېشەن، هینو وېشەن، وەختێ حەیدەرش زامڎار کەرد، پەیش کېیاست پەی ئانەی زامەکەیش بەسۊ:
فکرش کەردەوە، ماهی مونەوەر
چېش بڎۊ جواب، شېری دلاوەر
دمای ئاخ و داخ، ناڵینەی بېهۊ
سەرش بەرئاوەرد، ئەو یاری خۆش خۊ
واتش: ئەی دایە، هامڕازی ڕازم
ڕەفېقی موئنس، یاری دڵوازم
هۊرگېرە شەدە، بەرەش وە دما
واچە، سەوداکەر، پاسەش فەرماوا
ئەرسەڎ، کە شەدەش، مومتازی عامەن
بەڵام دەردم فرەن، نە جای هانامەن
جەیوەر گەنجی من، بە میراس دادیم
پەرېی ڕۆژی تەنگ، وەقتی ئازاڎیم
بابۊم سەبتش کەرد، بە نابەجۊری
بەخشا، بە ناهاڵ، دېوی دلۊری
هەرچڼ سەعیم کەرد، نەکەردم چارە
گردم شیی نە دەست، نەمەندم چارە
کلیدش بە دەس، ئەژدیهایێوەن
بەڎ زات و بەڎ تەور، بەڎ بەڵایێوەن
مەگەر جەهاندار، جەهان ئافەرین
بیاوۊ بە داڎ، بەندەی کەمتەرین
ڕەهانۊم، جە دەس، دېوی دېرین خۊ
وەرنە مەحاڵەن، عیلاج نمەبۊ.
[1]