داستانۊ حەیدەری و سنۊبەرۍ
بەشۍ چل و نۊهەمە
باس جە شیوەنی و لاونایۆ سنۊبەرۍ پەی حەیدەری کەرۊن، وەڵۍ ئانەی پەی یانەو زەمای نادڵگیر بریۊ:
حەیدەر بەگ، جەو دەم، پېسە دی یاران
وات: نەبی نسیب دڵەی غەمباران
پا خەسووی یاران، گرد لوان وە بەر
تەنیا، مەند بە جا، خورشیدی خاوەر
حەیدەر جە پېوار، جە بېقەراریی
زەڕ ئەفشانیش کەرد، شەدەی مرواریی
لەرزا جە تانەی ڕەقیبی بەڎگۊ
چپان هۊرش گرت، نېیاش بە باهۊ
وات: ئەڵبەت، یە کار دېوەن پەرییەن
وەر نە جە ئاڎەم، خەیلێ بەرییەن
پەرێ حەیدەر بەگ دەس کەرد بە زاریی
مەڕېزا بە ڕووش، ئەسری مرواری
بە نەرمە نەرمێ، حەیدەر مەولانا
ئاهش نە کۊی نەجد، مەجنوون مەتاونا
مەوات: ئەی غەریب دوورکەفتەی وەتەن
ئەی یاری غەمخوار، بېماوا و مەسکەن
ئەی بېخورد و خاو، ڕۊخ جە هېجران زەرد
ئەی دایېم خەریک هەناسانی سەرد
ئەی نەوجوانی بەکام نەیاوا
ئەی سەرسام وەشۊن سەهەندەی ساوا
دا بڎیە بەکار ئەی چەرخی چەمەر
ڕەنجم دا، بە تۊ، گەنجم قەزەنفەر
تۊ پەی من، نە موڵک وەتەن وېیەردی
چڼ وەختەن، پەرێم، زوخاوان وەردی
ئاخر گوڵباخچەم، بڕیا، وە ناکەس
عیلاجم نېیەن، دەسەڵاتم چەس
تۊ وېت مەزانی، یە کاری جەورەن
سا من چېش کەروو، بابۊی من گەورەن
ئېد وات و کېشا جە دڵ ئاهی سەرد
ئاهش، جە ئاسمان زېیاتەر وېیەرد
[1]