داستانۊ حەیدەری و سنۊبەرۍ
بەشۍ شەسس و چوارەمە
با بلمێ پەی لاو قەزەنفەری، چاگە لاشەکەش جیامەن، کەسی نەزانان کە کوشیان، ئەڎاش سەحەر زوو لوا هەواڵێش زانۊ، وەختێ لواچووەر دیش:
بشین، بە سەروەخت، دایەی قەزەنفەر
ئەو شەو ڕاحەت بی، تا وە سووب سەحەر
سەحەر هۊرېزا، جە خاوی شیرین
پەی عەزمی باپۊس، شای بۊ عەنبەرین
ڕوو کەرد وە بارگەی بەرزی دامادیی
بە زەمزەمەی بەزم، ئاهەنگی شادیی
لوا، بە جامڕېز، پەی ڕوو سفیدی
نەزاناش مەبۊ، بە نائومیدی
ناگا،نەزەر کەرد نېیەن قەزەنفەر
دیا، کە کەفتەن، جە یانە، بە سەر
غەڵتانەن بە هوون، وەختی دامادیش
وە میراس کەفتەن، ئەساسەی شادیش
پەنجەی خاڵینش، هەم ژنیان بە هوون
سەرتاپاش، بە هوون بېیەن لالەگوون
دایە، ئېڎش دیی خرۊشا، بە قار
پەرێ قەزەنفەر، چوون هەوری وەهار
دەست بەرد مەقنەعە، جە سەر شەندەوە
گیسووی سفیدش، یەکیەک کەندەوە
سوورەت بە ناخوون پارە کەردەوە
مەناڵا، بە تاو، ئاهی سەردەوە
مەوات: بەسەرگەرد بەزمی شادیت بام
وە کام نەیاوای، نامورادیت بام
دایە وە قووربان، یانەی وېرانت
باوانت شېویۊ، شېویا باوانت
پەی چی شادیی، بی، بە سەرنەبەردیی
پەی چېش عەیشی وېت، تەمام نەکەردیی
ئامام وە تەعجیل پەی زەڕ ئەفشانت
ئیسە مەوینوو، بە هوون غەڵتانت
ساتێ سەر هۊردار، بەزمی شادییەن
وەختی عەیش و نۊش، هەم دامادییەن
هۊرېزە جە خاو، وەختی نەهارەن
خەڵقانی کشمیر، نە ئېنتېزارەن
مدران، چەمەڕای وەختی دامادیت
تاکە بواچان، موبارەک بادیت
غوڵامان، غەمگین، ڕای ڕۊزگارەن
مەواچان، هۊرزە، فەسڵی شکارەن
فرە خاس نېیەن، خڎۍ بەیانە
میرزام هۊرېزە، وەختی دیوانە
بشۊ بە دیوان، شای واڵا سەریر
پەی بوسانی دەست، میرانی کشمیر
[1]