یەکەم ڕۆمانی #سەلاحەدین دەمیرتاش#، هاوسەرۆکی پێشووی هەدەپە، لەلایەن (نێتفلێکس)ەوە کە خزمەتگوزارییەکی کرێی سەرهێڵ و تایبەتە بە فیلم و زنجیرەتەلەڤیزیۆنییەکان، دەچێتە ناو زنجیرەدرامایەک و بەرهەمهێنانەکەشی بە هاوبەشی لەلایەن وڵاتانی تایوان و چینەوەیە.
ڕۆمانی (#سەحەر#)، کە دەمیرتاش لە گرتووخانەی #ئێدیرنە# نووسی و بڵاوی کردەوە، لە یەکەم وەرزی زنجیرەدرامای (Shards Of Her)، کە بەرهەمهێنانی بە هاوبەشیی تایوان و چینە و بەرهەمی نێتفلێکسە، لە یەکەم ئەڵقەیدا، باسی لەو ڕۆمانە کردووە و چیرۆکەکەی بەتەواوی نیشان داوە و ناوی کارەکتەرەکەیشی هەر بە ناوی سەحەرەوە کردووە.
وەکوو ئەوەی میدیاکانی تورکیا و جیهان باسی دەکەن، ڕۆڵی سەرەکیی زنجیرەدراماکە بە سەحەرە کە لە ڕۆمانی دەمیرتاشەوە وەرگیراوە.
ڕۆمانەکە باس لە کچێک دەکات، کە لەلایەن چەند کەسێکەوە دەستدرێژیی سێکسی دەکرێتە سەر و پاشان ماڵی باوکی سەحەر، بۆ پاککردنەوەی نامووسی خۆیان، سەحەر دەکوژن، لە کاتێکدا سەحەر قوربانیی دەستی پیاوسالارییە.
ڕۆمانی سەحەر، بۆ سەر 20 زمانی جیهانی وەرگێڕدراوە، کە یەکێک لەو زمانانەش زمانی چینیی بووە، بۆیە لە زنجیرەدرامایەکدا سەحەری دەمیرتاش، خراوەتە سەر نێتفلێکس.
دەمیرتاش، لە هەژماری خۆی لە فەیسبووک دڵخۆشیی خۆی بەو هەنگاوە دەربڕیوە.
ئامادەکردنی: #سارا سەردار#
[1]