جوانیت ویەرد، وادەی پیریتەن
شېتە، شادیت شی، ها، زویریتەن
ڕووی ئەوەڵ سفید، سیا بی چوون قیر
ئەوەڵ سیا، سفید بی چوون شیر
ددان نە دەهان تاک تاکێ وەش مەند
یانۍ های ددان زېندەگی وېت کەند
دووربینەکەی جەم، بېیەن تەنگ و تار
یانۍ عادەت کەر وە تەنگی مەزار
پیشانیت لوان وە بانی زانۊ
خوا حافېزەن پەی هەوار نۊ
فکرێ دەروەکار جەی وەرتەر کەردەت
باوەر وە خەیاڵ عومرێ وېیەردەت
خەجاڵەت بەزم هام فەردانەنی
ئەنگوشت نمای بەین ئېنس و جانەنی
هەر سەرزەمین پا منیەینە لېش
فەریاد موانۊ هەر ئەشیا پەی وېش
عاڵەم هەراسان، تەقسیر باریتەن
مەلایەک حەیران شەرمەساریتەن
قەبرەیچ پەی ئەعزات نە ئېنتېزارەن
وە سیاسەنگ بای چوونت قەرارەن
میزان جە گونات دڵ پڕ ئەندېشەن
فکرێ گرانی و بەن بریان پېشەن
تا نیمگېیان مەنەن تۊبە کەر بە دڵ
چە حاسڵ «ڕەبونا ئەغفەر» ، سەوا
نیمەیێ نیمەشەو جە خاو بېدار بەر
پەی جەستەی خەستەت زاری و زگارکەر
دەست موناجات، هۊردارە نە دڵ
بناڵ نە دەرگای حەل کەردەی موشکڵ
بڕېزە ئەسرین جە چارە شوومی
بوانە فەردین خاڵی مەعدوومی
«یا جە گۊنای من کەرەم ئاوانتەر
ڕەحمەت جە تاوان من فەراوانتەر!
هەر تۊنی و تاک، دانا و تەوانا
تۊم هەنی هەنی ئەو کېم بۊ هانا»
بەڵ چوون کەریمێ شای کەرەم بۍ شۊ
بوېیەرۊ جە جۊرم شەرمەساری تۊ
جە گۊزەشتەی تۊ سەرگوزەشت ئارۊ
جەو بوزۊرگتەرەن ئەو وە ڕووت بارۊ
یا قائم بە زات یەگانەی بۍ چوون
ئەگەر نەبەخشیم، خەلاسیم جە کۊن
«ئەحمەد» مەتەرسە گۊنات عەزیمەن
ئەحمەد شافېعەن، خالېق کەریمەن
#ئەحمەد بەگی کۊماسی# [1]