جەفای تۊم وەردەن، جەفای تۊم وەردەن
ئاریز من یەند جەور جەفای تۊم وەردەن
نەعېشم هانە حاڵ غەڕغەڕەی مەردەن
ها، یاوا وەعدەی گېیان تەسلیم کەردەن
ئینە گرد جە داخ جەور جەفای تۊ
هیچ نەدیم و چەم ساتێ سەفای تۊ
بەو خوا قەسەم واحد فەردەن
حېس تۊش وەی تەور و جوور ئاوەردەن
کزە و قرچەی جەرگ بۊی کەواو دڵ
گرپەی گڕەی نار دەروون پڕ چڵ
ئەو کزش کەردەن خەلایېق ئەسەم
ئېد سارای وېساڵ پۊشنان وەتەم
خەوفم هەر ئیدەن من جە مەردەنم
بە وەقت تەسلیم گېیان سپەردەنم
بەیانم وەسەر نەکیر و مونکەر
بواچان کېتەن خوڎا و پېغەمبەر
چېش بڎەو جواب، ئەو کۊ بەروو داد
نەو سەروەختەدا، هەرتۊم ها وەیاد
ئازیز! یە سزای ئېستېغنای وەسڵت
یە جەور غوربەت یە جەفای فەسڵت
یە دوود سینەی تەوەن تاومەن
یەدیدەی پەڕ نم شەو بېخاومەن
خۊ نەویت ڕازی بە وەسڵ یاران
پېم ئاورد دەردی غەریبی شاران
بارێ جەی غوربەت نەکەردات وەیاد
ئېسە، خۊ ها، وەڵگ عومرم شی وەباد
#ئەحمەد بەگی کۊماسی# [1]