داستانۊ گوڵ و بولبولی
بەشۍ یەکەمە
داستاننویس بەشۍ یەکەمەنە، باس جە ژیوایێ عاشقانەی بولبولێ کەرۊن، کە ماواش دلۍ باخ و گوڵزاریەن، بەڵام دماتەر پەیش بەرمەگنۊ، کە گوڵ بېوەفان، جیامازۊ و پەروازکەرۊ پەی کەشێ بەرزی، پی جۊرە:
خامە مەیلی تەبع، خوش نەوای دوڕسەنج
ئینشا کەرد حەرفێ، شیرینتەر، جە گەنج
نە کونجی دەروون، موشکاوی کەرد
تیمسالێ پەرێ ئاشقان ئاوەرد
حەقیقەت عەجەب سوخەن پەردازەن
عەجەب سەرگوزەشت، شەکەریی ڕازەن
یاران، عاشقان گۊش دەن، بە خامە
کەلامی شیرین ئینشا کەرد نامە
چن ساڵ، پەی لۊنە، بەبۍ خان و مان
نە گوڵزارێ دا، گیرتەبۍ مەکان
ئاخر، کە زاناش، گوڵش بۍ وەفان
بۍ سەبر و بۍ ڕەحم، مایېل بە جەفان
بېوەفایی گوڵ، وەنەش بی ڕۊشن
تەرحی جیایی، وست چەنی گوڵشەن
بەرشی جە گوڵزار، بێ وەفای، بۍ مەیل
دامان و کویێ، گېرتەبێ نە وەر
نە دامانی کۊ، بەیدێ وېرانە
خاروخاشاکێ، جەم کەرد پەی لانە
ئاشیانەیێ، سازنا، پەی وېش
تېدا گرت ماوا، خەستەی دەروون ڕېش.[1]