داستانۊ گوڵ و بولبولی
بەشۍ دوەمە
بولبولی خەمگین جە بېوەفایی مەعشووقېنە، بارگەش فاڕاوە، ماوای تازېشەنە (کەش وکۊ)، هېڵێوەش نیارە، دماتەر بە قودرەتو قادری، هېڵە ترەکاو بەچێ بەرئاما:
بە حوکمی قودرەت پادشای مەعبوود
یەک دانە (بەیضە)، ئاوەرد بە وجوود
مودەتێ کېشا، جەفا و دەردیسەر
بەچەش جە (بیضة)، بەرئاوەرد وەبەر
بە لانەو بەچەی وېش دڵ کەردش شاڎ
مەیل و موحببەت، گۊڵشەن دا وە باد
پەی دانە و ئابش، هەر سووب تاکو بە شام
خار و ئاسایېش، وەنەش بیی حەرام
مودەتێ پەی لۊن، پەروەردەش بە ناز
تا، ئەندەک ئەندەک، بەچەش بی پەرواز
هۊیێ هۊرېزا، چوون، عادەتی پېش
بوڵبوڵی مسکین، خەستەی دەروون ڕېش
چوون هەردە جاران، پەی ئاب و دانە
بەرشیی، پەرواز کەرد، جە ئاشیانە
تەنیا، بەجا مەند، چوون بەچەی نەوڕەس
هەوای باڵپەڕ، وستش نە هەوەس
وەجد و نیشانتێ، وەنەش کەرد ئەسەر
وستش نە جنبش، هەوای باڵ و پەڕ
دەس کەرد بە سروود، بە نەغمەخانی
بە نیشات و زەوق، بە باڵپەڕانی
جە دمای وانای، نەغمەی مەستانە
بەرشیی، پەرواز کەرد، جە ئاشیانە
دیڎە وەڵا کەرد، نە دەشت و کۊسار
خەیلێ، نیگاکەر، سەراسیمەوار
جە ناکا نەسیم بۊی عەتری شەماڵ
دا، نە دەماغش، پەشېویاش حاڵ.[1]