داستانۊ گوڵ و بولبولی
بەشۍ نۊهەمە
بولبول، گۊشش پەی حیکایەتەو بەچەکەیش گېرت، جە بارەو عەشقیۆ، ئاڎییچە ماچۊ: هەرچیت وات جە بارەو عەشقیۆ، فرە ڕاسەن، گەر ئا جەفاو زەحمەتە پەی کەسێ وەفاڎاری بۊن، نەک پەی (گوڵ)ێ، کە هەر ساتو دەمێ ئینا باخەڵەو کەسێنە، یام پەی کەسێ ئەغیاری ڕەونەقش مرمانۊ:
خەستەی مەینەتکېش، دڵسۊزەندەی نەفت
بولبول حیکایەت، جە فەرزەند شنەفت
واتش: ئەی فەرزەند، بەر گوزیدەی من
قوەتی زانوو، نووری دیڎەی من
جە تەعریفی عەشق، هەرچیت وات ڕاسەن
بۍ شوبهە و بۍ ڕەنگ، بۍ کەم و کاسەن
جەفا عەشق وەشەن، کېشی پەی یارێ
یاری بەینەتدار، ساحیب قەرارێ
وېش، بە ڕەنجبەردەی عاشق بزانۊ
گاگا ئیلتیفات، پەنەش بنمانۊ
نەک یادی سەرکەش، بۍ خەبەر جە دەرد
لا قەید و بۍ باک، مەیل و موبەت سەرد
ئەو گوڵ، نەسیمش تۊ فریونان
کەم فامت کەردەن، حاڵت شېونان
چن ساڵ چێوەڵتەر، من جە سەودای ئەو
نە قەرارم بۍ، نە ئارام، نە خەو
بە چن لەون سەردەش، نەغمەخانیم کەرد
چن شەو تاکو سەحەر، پاسەبانیم کەرد
چن کېشام نە ڕاش، جەفای بۍ شمار
مەجرووح بی سینەم، بە چن زەخمی خار
چن جار دامی مەرگ، نە ڕاگەم تەندەن
چن سەنگی سیا، پەی باڵم شەندەن
غەرەز چن جەفام کېشا نە گوڵزار
سەفاێێ نەڎیم، غەیر، جە زەخمی خار
زانام عەبەسەن، جەفا بەردەنم
کەردەی نەدارۊ، خزمەت کەردەنم
موشەخەس بۍ لېم، بۍ ئیعتیبارەن
بۍ شەرت و بۍ شۊن، لاقەید جە یارەن.[1]