داستانۈ گوڵ و بولبولی
بەشۍ دواڼزەهەمە
ئەڎاو بەچە بولبولی، گۊشش دارا پەی گفتو بەچەکەیش، ئیتر زاناش دەردەو عەشقی دەواش نېیەنە، خەیاڵش لاو بەچەکەیشۆ بۍ، بەڵام بەچەکەش خەیاڵش تەنیا لاو گوڵیۆ بۍ، تاکو سەحەر هەر خەفەتو بەچەکەیشەنە بۍ.
مادەر جە فەرزەند شنەفت ئەی گوفتار
زاناش دەردی عیشق، هیچ نەدارۊ چار
وەلحاسڵ ئەو شەو هیچ نەکەردەن خاو
ئېڎ مەنا، مەکەرد، ئەو مەدا جواو
دایە، پەی فەرزەند فیکرش نە دڵ بۍ
فەرزەند هەر فیکرش، وەسوەسەی گوڵ بۍ
ئېد پەندش مەدا، ئەو جە عیشق مەوات
تا شەفەق بیی شەقق، سۊفی کەرد سەڵات
بە حوکمی قودرەت، ڕەببولعالەمین
ڕۊشن بیی، تەمام سارا و سەرزەمین
شای خاوەر، جە بورج مەشرق کېشا سەر
بە شادمانی نیشت نە تەختی زەر
سان و سوپای داج، پېش نەمەند قەرار
جە خۊفی خورشید، فەرار بیی قەرار
ئینس و جڼ و وەحش ئەحیای ڕووی زەمین
جە خاوی خەفڵەت، یەکسەر بېدار بین
جە خاو غەفڵەت تەمام بین بېدار
وەندەن حەمدی زات، پادشای موختار.[1]