ساۋەر کوای جە هۆرامانەنە
ئەوەنویستەی و دەسکاریکەردەی: ئەسعەد ڕەشید
جە هۆرامانەنە، (ساۋەر) یان(پەتڵە)، ڕزقێ گرانبەها بیەن، گرڎ ساڵێ، هەر یانێ بەپاو تەواناو وېش و پېویسی وېش ساۋەرش کەردەن پەی زمسانی. گەنمۍ(خەلە)ی پاکو دڼە گۆرۍ، دمای گرینایشا، دلۍ دۊڵۍ تەوەنینېنە، کواشا، وەختو کواینە پووشۍ تۊکڵەکەیشا جیێباوە، دمای جیاکەردەیۆ پووشەکاشا، دیسان سەرو بانی، یان دلۍ ساناڵېنە مڎاشا وەر و وەرەتاوی تاکو خاس وشکۍ باوە، دماتەر بە هارە(دەسهاڕە) هاڕاشا، ئیتر ئاماڎەن و مەکریان بە چاشتی، شۊرباوی، قبووڵی، یەکاوە.
ساۋەر کوای فرەش پەنەمشۊ، ماڼیایش گەرەکەن، جە هۆرامانەنە ئامرازو کوای تەنها دۊڵەی تەوەنینە یان دۊڵەی دارینە، کە دەسەو دۊڵەکېچ، تەوەنینە یان دارینەن.
ساۋەر خاستەرین و عالتەرین واردەو هۆرامانین، تینی مڎۊ بەڎەنیشاو پەی سرووشتە سارد و سڕەکەو هۆرامانی گونجیا و سازەن.
ئاماڎەکەردەی خەلە پەی ساوەری:
مەشۊم خەلەی عالو جوان هۊرچنیۊ، گەر پاکیچ نەبۊ، ژەنەو یانەی بە(وېچنە) وېچۊشو پووشو پیسیەکەیش جیاکەرۊوە، دماتەر(کەرۊش وارە) پەی پاککەردەیۆش جە پووشی و تەپوتۊزی، دماتەر چنیەی (مرۊ)کەو دلېش، بە تەمامی پاک مەبۊوە. ئیتر حازرەن پەی گرینای و کەردەیش بە ساۋەر یان ۋڵۊشە.[1]