تەڵانسازی جە باخەکا هۆرامانینە
ئەوەنویستەی و دەسکاریکەرڎەی: ئەسعەد ڕەشید
هونەرو تەڵانسازی، کە جە هۆرامانەنە دیارەن، هۊرچنیەی تەوەنان سەرو یۊیۆ تاکو بەرزی گەزێ، یان دوۍ گەزا، بە وشکە کەڵەک، دماتەر پەشتەو دیوارەکەی بە خۊڵە پەڕکریۊوە و تەخت کریۊن، ئیتر نەمامۍ بەپاو کەم و فرەیی ئاوەکۍ مەنریاو، بنەیچشانە پارچە کیارۍ پەی سەوزە و تەماتە و خەیاری و ....هتد، بە کاڵای زەمینەکەی، وەشکریان.
هونەر و تەڵانسازی، سەرەڕاو دیمەنی جوانیش، گژیای هۆرامییەکا وېناکەرۊن، چەنی سرووشتی، وەختێ کەشێ تەمام سەخت بە تەڵانۍ جە دامانۊ پەی پۊپەی، کریۊن بە باخ، ئانەی سەلەمنۊ. کەڵەکە تەوەنینەکۍ، بە مەڵامەتو وارانی و ئاموشۊی، کۊبیەیۆ ۋەرۋۍ سەرو کەڵەکەکاوە جە وەرزو زمسانینە، بەعزێشا زەرەرشان پەنە مەیاوۊن، یان وڕارە، پەوکەی خاوەن باخ، یان باخەوان، جە وەهارەنە کەڵەکە وڕایەکا هۊرچنۊوەو وەشېشا کەرۊوە.
هەر یاگێچ ئاویش پەی نەبریۊ، کەراش بە(مېوە دەیمی)، یان دار و وامۍ و فستەقی و چەقالا(وامەتاڵا)، بە فرەیی باخۍ هۆرامانی، دارو(وەزۍ، تفۍ، هەنار، هەنجیر، شېڵانۍ .هتد)، بەعزەجارێ کەراش بە (زەڕاتەسوورۍ)، کە بەرەکەش پەی واردەی و ساقەکەېچش پەی (گزی) بەکارمەیا.[1]