باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و سییەمە
دمای گفتوگۊ مېیانو محەمەدی و جوبرەئیلی، محەمەد دیسان گېڵاوە پەی یانەی، خەدیجە لوا پېوایشۆ، ئەحواڵش پەرسا، ماچۊ: نوورێ مەوینو ڕوخسارتەنە، هەرگیز نەڎیەنم جە گونای ئاڵتەنە.
خەدیجە لوا، وە ئیستیقباڵش
جە ڕووی ئیرادەت، پەرسا، ئەحواڵش
وات: دایۊ و بابۊم، سەڎ جار فیدات بۊ
ڕۊحی ڕەوانم، سەرگەردی ڕات بۊ
نوورێ، مەوینم، جە ڕووی جەماڵت
هەرگیز، نەڎیەنم، جە گۊنای لاڵت
فەرما، پەیم بکەر، سەرگوزەشتەی وېت
ئەی نوورە، جە کۊ، ئاخر یاوان پېت
حەزرەت، بەیان کەرد، خاتری مەلاڵ
ئەوەڵ، تا ئاخر، چگۊنەگی حاڵ
خەدیجەعەرز کەرد، فەردی بۍ زەواڵ
خوڎای لا یەنام، بەرزی بوڵند ماڵ
لوتفش چەنی تۊن، دڵ مەدەر وە دڵ
چەنی خەیاڵات، وېت مەکەر خجڵ
بە قەولی واتەن، سەرداری سەروەر
دوو سێ ڕۊ، جە ماڵ، تەوەقف بکەر
هەر وەخت جوبرەئیل زاهېر مەبۊ لات
من ئەعلام بکەر، سەرم بۊ فیدات
دیسان جوبرەئیل بە شېوەی بەشەر
ئاما، وە خزمەت، سالاری مەحشەر
خەدیجە زاناش، مەعلووم بی جە لاش
حەزرەت جوبرەئیل، ها، جە نەزەرگاش
وە بانی زانۊی چەپی وېش جە نۊ
نیشانا حەزرەت، شای فریشتە خۊ
پەرسا، مەوینی؟ حەزرەت وات: نەعەم
ها، وە فەوقەوە، مەوینووش وە چەم
دیسان نیشاناش، وە زانووی ڕاسش
پەرسا، مەوینی، وېش و ئەساسش
حەزرەت، فەرماوا: هېمای دیارەن
ئەو نە جاگەی وېش هەر بەرقەرارەن
باز حەزرەتش بەرد، وەتۊی جامەی وېش
پەی ئېد، تا خاستەر، مەعلووم بە بۊ لېش.[1]