#وەلی دېوانە#
هەی نائومېدی، هەی نائومېدی
هەی ڕەنجەڕۊیی، هەی نائومېدی
هەی یاران چۇن من بەدبەختێ کۍ دی
پەی هاڵ نەزانی ڕۇم کەرد نە بېدی
چۊڵان تەیکەردم «جەبەڵان» یەکسەر
جە تۇس و تۇن بیم یاوام وە تەبەر
هەردەی نەجدی قەیس گشت دام وە پاوە
پەروانەی دەستۇر سەر وە سەوداوە
یاوام بەو زامن ماوای قیبلەم بۍ
مەکان و مەسکەن گوزەرگای «شەم» بۍ
هەواران چۊڵ دیم زامن وېرانە
بایەقوش بەستەن جەو مەسکەن لانە
نە دەنگی دەییار نە سەدای یارەن
دەنگی وېرانە (وادیالقهار)ەن
پەرسام بایەقوش هامدەردی دەردم
ڕەفېقی هامڕاز ناڵەی نەبەردم
من «پەروانە»ی وېڵ وڵگەی دامانم
جانشینی «قەیس» شای کەم فامانم
کۊشی کۊچی لەیل شای شەم جەمینم
گوشادی خاتر خاری خەمینم
بایەقوش واتش: «پەروانە»ی کەم فام
ئیسە ئامانی وەی ماوا و مەقام
کۊچی خێرش کەرد لوا وە لېڵاخ
پەی من حەسرەت مەند پەی تۊ ئاخ و داخ
وە ئېقباڵی نەحس وېم دامامەوە
نائومېد جە شەم هەم ئامامەوە
یاران هامسەران نائومېدە وېم
هەی عەبداڵی «بەڕ» دۇر جە زێدی وېم
[1]