هەرکەس کۊشیۊ، ئانە شەهیدەن.
جەنگو مېیانو ڕووسی و عوسمانینە ساڵەو(1336ک)، چن مەڵڵێ و عولەمێ ملا پەی لاو عەشرەتو(مەنگوڕ و مامەش)ی، جە دیواخانو حەمەئاغاو مامەشی، ڕەئیس عەشرەتەکۍ پېسە هەمزە ئاغاو مەنگوڕی و حەمەمین ئاغاو بڵباسی چن سەر عەشرەتێتەر کۊنیشت کەران، یۊ جە مەڵڵاکا قسېشا پەیکەرۊن و ماچۊ: ئینە غەزانەو سەرو موسڵمانا واجبەنە، هەرکەس کۊشیۊ ئانە شەهیدەن، پایەو شەهادەتی فرە گۆرەن، خۊ گەر نەکۊشیۊ، ئانە بۊ بە غازی، پایەو غازیچ دیسان گۆرەن.
وەختێ مەڵڵا چەنەبۊوە، کېخێوە بڵباسی دلۍ مەجلیسەکێنە ماچۊ: خاسا ماموسا، گەر خوڎا ئارەزوو کەرۊ، بە ماوەو یەک سەعاتی هەرچی ڕووس هەن دلېشەنە مەبەرۊ؟، مەڵڵایچ ماچۊ: بەڵۍ متاوۊ.
کېخایچ ماچۊ: ئینجا وەختێ خوڎا وېش پەنەشکریۊ، چی گردی مەکشۊ، ئیتر چی فیتنەکەی وزۊ ملوو ئېمەرە؟.[1]