ناونیشانی بابەت: بوونی تەنی نامۆ لە گوێدا
ئامادەکردن: د. #دیلان عارف عەلی#
چوونی تەنێکی بێگانە بۆناو گوێ یەکێکە لەو حاڵەتە کتووپڕانەی کە ئەکرێت دووچاری هەموو کەس ببێتەوە بەتایبەت لە منداڵدا.
- ئەو تەنانەی کە لە گوێدا گیردەبن بەزۆری بریتین لە پارچە کاغەزی بچووک، بەرد، موروو، پیلی بچووکی کاتژمێری دەستی، یاخود زیندەوەری بچووک یاخود لۆکەی گوێ پاکەرەوە.
- لەزۆربەی حاڵەتەکاندا کەسەکە بە دەستی خۆی ئەو تەنە دەکاتە ناو گوێیەوە بەتایبەت لە منداڵدا، زۆربەی جار هیچ نیشانەیەکی نییە، بەڵام هەندێک جار زیانبەخش دەبێت بەتایبەت گەر بچێتە قوڵای کەناڵی گوێوە و کە چەند نیشانەیەکی هەیە وەک:-
1- ئازار و سووربوونەوە و بوونی دەردراوی گوێ.
2- کەمبوونەوەی هەستی بیستن بەتایبەت گەر مادەکە کەناڵی گوێی گرتبێت.
3- لە حاڵەتی بوونی ئەو نیشانانەدا پێویستە کەسەکە بەزوترین کات سەردانی پزیشکی پسپۆڕ بکات.
- لەکاتی گیربوونی تەنێک لەناو گوێدا هەرگیز دەست یاخود گوێ پاکەرەوە یاخود هەر ئامێرێکی تر بەکارمەهێنە چونکە زیاتر مادەکە پاڵپێوەدەنێت بۆ ناو گوێ.
- ئەگەر ئەو تەنەی چووە ناو گوێوە پاتری کاتژمێری دەستی بوو پێویستە بە زوترین کات کەسەکە بچێتە بەشی فریاکەوتن یاخود پزیشکی پسپۆڕ بۆ دەرهێنانی مادەکە. [1]