دەسەڵاتو فەرمانڕەوای داڎپەروەر، ڕەزاسان کوڕو حسێن بەگی کوڕو بارام سانی کوڕو عەباس قولی سانی جە هۆرامان.

وەختێ خالیدسان و حەیدەرسانو بەلخەی کوشیێ، هامکات چا ساڵېنە دەسەڵاتو ڕەزاسانی (1756ز) مەرزیانەرە، بەبۍ ئانەی ڕەزاسان داوا جە سڵېمان پاشای کەرۊن، یان بلۊ پەی لایش، کە بە بابا سڵېمان بەنامبانگەن، بابا سڵېمان باباگۆرەو پاشایا سلېمانین، شارو سلېمانی ئاڎی بنیاڎنیان. بابا سڵېمان و خەسرەو خانی ئەردەڵانی، هەردوېشا فرمانو دەسەڵاتداریشان پەی ڕەزاسانی بەرکەردەن، ڕەزاسان جە خزمەت کەردەینە بە قۊم و کەسوکار و هامڕێکاش، درېغیش نەکەرد، فەرق نەوزۍ مېیانو قېخا و چېردەسەی، گۆرە و گولانە، گەنج و پیری، خەڵکو هۆرامانی وەختێ ڕەزاسانشا پا شکڵە دی، کە داڎپەروەرەن و جیاوازی نمەکەرۊن مېیانو کەسینە، قینە کونەکېشا شۊریاوە، گرڎکەس چەنەش دڵنیابۍ، پا تەعرە ڕەزاسان بە بۍ جەنگ و قڕە، دلۍ چەقو ناوچەکێنە دەسەڵاتش وەرگېرت.
ڕەزاسان بە پېچەوانەو سانە وەڵینەکا، چونکم شارو هۊرامانیش بە کاولی دیەبۍ، ئاوەڎانش کەردۆ. خەڵکو هۆرامانی سایەو دەسەڵاتو ڕەزاسانینە، ئۆپەڕو ئارامی و ئاسودەیینە ژیوېنۍ، ناوچەکۍ تەرو کوردەسانی چېرو زوڵم و زوری و تاڵانینە گوزەران کەرېنۍ، خەڵکو ناوچەکا تەری پەناشان پەی هۆرامانی بەردېنە، ڕەزاسان شایی و شیوەنەنە بەشداری کەرۍ و یارمەتی خەڵکی دۍ، کۊنە دژمەنەکېش بە سیاسەتو ژەن و ژەنوازییۆ، نزیکۍ یوترینیش کەردێ، خەریکو ئاوەڎانکەردەیۆ مزگیەکا، پردەکا، ڕاکا بېیەن، فەرمانڕەوێوە چامنە دلۍ سانەکانە دەگمەن بېیەن، ڕەزاسان زیاتەر جە ویس و پەنج ساڵۍ فەرمانڕەوایی هۆرامانیش کەردەن، چا ماوەنە نە کەسش کۊشتەن، نە جەریمەو تاڵانی کەسیش کەردەن، نە کەسش زیڼانی کەردەن، دماجار ساڵەو (1783ز) کوچی دمایینش کەردەن.[1]