ب ناڤێ خودێ یێ مەزن و دلۆڤان
ب خەمەکا گرانڤە ئێڤارییا ڕۆژا ئینێ #17-02- 2023# پێشمەرگە و فەرماندەیێ ماندی نەناس و تێکۆشەر و خەباتکەر و نیشتیمانپەروەرێ گەلێ مە #حەمید ئەفەندی# وەغەرا دووماهییێ کر.
حەمید ئەفەندی د قۆناغێن جودایێن بەرخوەدان و خەباتا گەلێ مە و پارتییا دەموکراتا کوردستانێ و د شۆڕشا ئەیلوول و شۆڕشا گوڵان و سەرهلدان و هەروەها د قۆناغا پشتی سەرهلدانێ و شەڕێ ڕزگارکرنا عێراقێ و شەڕێ دژی تیرۆریستێن داعشێ ژی دا پێشمەرگە و فەرماندەیەکێ ئازا و بەرگریکارەکێ سەرسەختێ بەها و ئارمانجێن گەلێ خوە بوو.
حەمید ئەفەندی ژییێ خوە دپێناڤ دۆزا ڕەوایا گەلێ خوە تەرخان کر و پێشمەرگەیەکێ وەفادارێ ڕێبازا بارزانی و کوردایەتیێ و هەردەم جهێ باوەڕی و پشتبەستنێ بوو.
وەغەرکرنا حەمید ئەفەندی ژبۆ هەمییان خەمەکا مەزنە، کوردستانێ پێشمەرگەیەکێ قەهرەمان ژ دەست دا و من ژی برا و دۆست و هەڤسەنگەر و هەڤالەکێ خۆشتڤی ژدەستدا.
سەرەخۆشییێ ل خوە و سەرکردایەتی و کادیر و ئەندام و لایەنگرێن پارتی و هەڤاڵ و هەڤسەنگەر و مالباتا هێژا و کەسوکارێن خودێ ژێ ڕازی و هەمی خەڵکێ کوردستانێ و پێشمەرگەیێن قەهرەمان دکەم.
ژ خودایێ مەزن دخازم گیانێ خودێ ژێ ڕازی حەمید ئەفەندی ب بەهەشتا بەرین شاد بکەت و سەبر و ئارامییێ بدەتە هەمی لایەکی.
انا للە و انا الیه ڕاجعون
مەسعود بارزانی
17ی شوباتا 2023[1]