کاری بە پەلە ئەنجامێ خاسش نېیەن.

جەنگیزخان بە نیازو ڕاوەشکاری زیارە، تیرو کەوانەکەش دا دەسو ڕەفېقەکاشۆ و واشەکەش (شاهێن) نیا سەرو قۊڵیشۆ، واشەکەش فرە تیژڕەوبۍ، سەرەڕاو مانیایێ فرەیشان، بەڵام هیچ ڕاوێشا نەکەردە، جەنگیزخان بە نائومېڎی گېڵاوە پەی دلۍ کەژاوەکېش.
دمای ئانەی مانیایش سەیاوە، چەنی واشەکەیش زیارە، لوانە دلۍ دارەسانێ چڕی، فرە گېڵا، مانیا، خەریکبۍ ئاورایۍ و تەژنایۍ پەکەش گنۊ، دنیا هامنێ گەرم بۍ، هانەو سەرچەمەکۍ، وشکشا کەردەبۍ، ئاویش دەسنەگنۍ، چۊڕە ئاوێش دییە سەرو تەوەنێرە چۊڕیېرە، بەڵام فرە کەمەبۍ، ناچاریېنە جامڵە زیوەکەش بەرئارد، کە دایېم پەنەش بۍ، نیاش وەرو چۊڕاوەکېوە تا پەڕبی، جامڵەکەش بەرد پەی دەمیش، بەڵام چا عانەنە واشەکە پەروازشکەرد و ماڵاش جامڵەکەیرەو ئاوەکېش متە، خان فرە تووڕەبی، بەڵام واشەکەش فرە گەرەکبۍ، هیچش نەکەرد، پەی جاری دوەمی دیسان واشەکە ئاوەکېش متۆ، ئیتر جەنگیزخان بە تەمامی تووڕەبی، جامڵەکەش نیاوە وەرو ئاوەکۍ، چەمێش سەرو جامڵەکەی و چەمێش سەرو واشەکەیۆ بۍ، بەڵام بە هەزار حاڵۍ نیمە بی، واشەکەش هېرشش ئارد، ئیتر خان نەما شمشېرەکەیش، بە شانای شمشېرێ سینەو واشەکەیش شەق کەرد، وەختێ تەماشەش کەرد مدیۊ ئاوەکۍ وشکش کەردەن، بەڵام تەژنای زۊر پەی ئاردەبۍ، پەوکەی زنارەکەرە هۊروەست تا سەرچەمەو ئاوەکۍ بېزۊوە، بەڵام چېشش دی؟
دلۍ سەرچەمەکێنە مارێ زەهرینی کوشندە تۊپابۍ، هەرکەس ئاوەکېش واردێوە یەکسەر کوشېش!
جەنگیزخان بە پەلە گېڵاوە پەی لاو لاشەو واشەکەیش، گېرتش باوشی، بەردشۊ پەی دلۍ کەژاوەکېش.
فەرمانشدا پەیکەرێ ئاڵتوونینش پەی وەشکەران، سەرو باڵێشۊ بنویسان (ڕەفېقێ وەختێ بە دڵو شمە مەکەرۊن، هەڵای هەر ڕەفېقا) ، سەرو باڵەکەی تەریشۆ بنویسان (هەر کارێ بە تووڕەیی کریۆ، ئاکامەکەش شکەستەن) .[1]