گېڵناوە، ڕوێشا کەریم خانو زەندی وەختو گېڵایۆشەنە پەی دیوانو دادی، کابرێوە هاوارش وەنە هورزۊ و هاوار کەرۊو ماچۆ: کۊن ویژدان؟
کەریم خانیچ ماچۊ: تۊ کېنی؟
کابرا ماچۆ: من بازرگانەنا، ئانەی بېم چەنەشا دزیا.
کەریم خانیچ ماچۊ: وەختێ ماڵەکەشا دزیەی تۊ چکۊبېنی؟
کابرای بازرگان ماچۊ: وتەبېنا
کەریم خان ماچۊ: چی وتەبېنی؟
کابرای بازرگانیچ ماچۊ: ئاخر ئەجیام تۊ هایتا!!
بە گېڵایۆ پەی وېیەردەی وەڵینی، وینمۍ هەرچی دەسەڵاتدار بېیەن دنیانە ئەر دکتاتوریچ بیەبۊ، یۊ جە هەرمانەکاش پارېزنای ماڵ و سامانو خەڵکی بېیەن، یۊ جە کارەکاش پېدا کەردەی قووتی بېیەن پەی خەڵکی، چوونکم زانانشا یۊ جە پایەکا ئەرەمەرزیارەی دەوڵەتی، ئارامی و ئاسایېش و ژیوای خەڵکین.
سەرجەمو دینە ئاسمانیەکانە بە ڕۊشنی باس کریان کە ئینسان ڕزق و ڕۊزیش جەلاو پەروەنگاریشۆ پەیش قەرار دریان کە پېسە قورئان فەرماوۊ (هو الذي خلق لکم ما في الارض جميعا ) کە ئینە بنەماو ئیشتراکیەتینە کە گرد کەسێ ماف و هەم بەشو وېش هەنەش سەرو ئی زەمینەینە.
ئەر تەماشەو فەلسەفەی مادیچ (کۆمۆنستی) کەرمۍ، (نان، کار، ئازا:ی) وینمۍ نان و گوزەران ئینا وەڵۍ گردو داواکاریەکاوە.
کەچی ئانەی یاگۍ سەرنجینە، جە ئیسەو جە وېیەردەنە، دەسەڵاتی کوردی نەک هەر هەرمانەی ئەوەڵینەش دابین کەردەی ژیوای پەی خەڵکی نەبېیەن، بەڵکم بەدرێژای وېیەردەو دەسەڵاتی کوردی ئەوەڵین هەرمانەش وۍ تېر کەردەی بېیەن، دەسەڵاتێ جیای ئانەی جە پەنجەرۆ تەماشەو خەڵکی کەرۊن، لوان وەرو ئاوېنەی هەر وېش وینان، خەریکو داگیر کەردەی مڵکو سامانی گردی بېیەن.[1]