درەختو ڕەزیلی نە بەرش هەن، نە سەی.

ڕەزیلی و دەسقووجنی نەوەشییەن، نەوەشیێ کە چارەش نېیەن، مروڤی دەسقووجیا تەنانەت نمەتاوۊ قەترە ئاوێچ بەخشۊ، دایېمە حەزش جە وەرگېرتەیەن.
مەڵڵای مەشهوورە چەنی چن دوس و ڕەفېقێش بە عەزمو سێرانی کۆتۍ ڕا، دمای نان و چای واردەی، لوێ سەرو گومێ ئاوۍ پەی دەسو دەم شتەی، مەڵڵا قاچش خزاو کۆت دلۍ گومەکۍ، ڕەفېقەکېش بە پەلە پەلامارەشادا پەی ڕزگار کەردەیش، هەر یۊشا یاگێوە هاوارکەرۍ مەڵڵای کە دەسش بارۊ با کېشاشۆ کەنار، بەڵام مەڵڵا دەسش درېژ نەکەرد، خەریکبۍ دلۍ ئاوەکېنە نوقوم بۊ، یۊ جە هامڕاکاشا ماچۊ: شمە گردیتا بەیدۍ ئی لاوە، من مەڵڵای مشناسو، تەنیا من مەتاوۊ مەڵڵای ڕزگارکەروون، مەڵڵا عادەتش نېیەن هیچ چېوێ بڎۊ، یان بەخشۊ، تەنانەت دەسیچش، دمایی بە مەڵڵای ماچۊ: ماموسا ها دەسم گېرە، مەڵڵایچ بە پەلە دەسش گېرتو ئاما بەرۆ.
ئینسانی بەهېز و دەسوەڵا ئاواتش یارمەتی کەسەکان، بەڵام ئینسانی بۍ هېز ئاواتش ئانەن چەنی تاوۊ سوود جە کەسەکا وەرگېرۊن.
خەڵکانۍ بەخشندۍ و مەزنۍ، پېسەنۍ کەشی بەرزینی، هەرچن چەنەشان نزیک گنیۆ، زیاتەر گەورەییشان بەر مەگنۊ، بەڵام خەڵکۍ لاوازۍ و ڕەزیلۍ، پېسەنۍ سەراوی (تراویلکەی) هەتا چەنەشان نزیک گنیۆ، زیاتەر هیچی و ناڕەسەنیشان بەرمەگنۊ.[1]