تارېخو ئەدەبیاتو یارسانی
بەشۍ سېڼزەهەمە
سەهەنگی دەودان، ئەچی شېعرېنە ماچۊ: من سەرهەنگی دەودانەنا، چەنی یاران جە سەرزەمینەنە مەگېڵمۍ پەی زیڼەکەردەیۆ ئایینو کوردان، ئەچیگەنە بە تەمامی بەرش مەوزۊن هەکە ئایینو یارسانی درېژەو ئایینە کۊنەکا وەڵۍ ئیسلامین، دیارەن مەبەسش جە ئایینو کۊنو کوردا، ئایینو زەردەشتیەن.
سەرهەنگی دەودان ، سەرهەنگی دەودان
ئەز کە ناممان ، سەرهەنگی دەودان
چەنی ئېرمانان ، مەگېلم هەردان
مەکۊشم پەرێ ، ئایینی کوردان
دماتەر ماچۊ:
ها یاگەم چۊڵەن ، ها یاگەم چۊڵەن
وە وېنەی فەرهاد ، ها یاگەم چۊڵەن
لالم نە باڵەن ، پۊستم نە کۊڵەن
هامدەمم کۊهەن ، یاران بە هۊڵەن
یاگېم چوڵەو بیابانەنە، هەر پېسە فەرهادی، بازیبەڼم نە قۊڵەن، پۊسم نە کۊڵەن، کەش و کۊ هامدەمېمەنۍ. شاعېر ئەچی دوە بەیتەنە مەگېڵۊوە شېوەو ڕەمزو سوفیزمی، وېڵ و سەرگەردان جە سارا و دۊڵ، مەگېڵۊ شۊنەو ڕاسی و هەقیقەتیرە،
هەفتم سەر خېڵەن ، هەفتم سەر خېڵەن
جە ئاسمان دا ، هەفتم سەر خېڵەن
هەر یەک وەڕەنگێ ، نەگەیشت و گېڵەن
هەر یەک پەی کارێ ، ئاوارە و وېڵەن
مەبەسو شاعېری جە (هەفت تەن) ی، حەفت فریشتېنۍ، ئینۍ وەڵۍ پېڎابیەو ئادەمیزادینە بیېنۍ، کارو ئاسمانەکا و زەمینیشان پەنە ئەسپاریان، جە ئاڤېستانە باس چا حۆت فریشتەیە کریان، بەڵام چاگە شش فریشتېنۍ، مەژگو هەر ششیشان مەبۊ بە فریشتەو حۆتەمی و (ئاهورامەزدا) ش چەنە درووس بۊن.[1]