دمای ئانەی میرزا ئۆلقاڎر نامە شېعرێش کیاستە پەی (سەید ئەحمەد بەگ) ی، داواش وەنەکەرد کە بلۊ پەی ڕاوەشکاری، بەڵکم نەچیرێش پەی ڕاوەکەرۊن، سەید ئەحمەد لوا پەی ڕاوەشکاری و چن نەچیرێش ڕاوەکەردۍ و چەنی ئی پارچە شېعرۍ کیاستېش پەی میرزا ئۆلقاڎری.
میرزام ئاماوە...
میرزام ئاماوە میرزام ئاماوە
گلەی نامه و تۊ دیسان ئاماوە
دەردانت جە نۊ هەم شکاواوە
دڵەی مەمنونم دیسان لواوە
حاڵیم بی جە حاڵ دڵەی غەمبارت
تەئسیر دا وەنەم زام ئەوگارت
زانام فوغانت نە لەیل و نەهار
بەرزەن گېج مەڎۊ چوون هەوری بەهار
خەیاڵت کەردەن یادت نەکەردم
جامێ جە شەراب، بۍ شەرتی وەردم
نە بە گیانو تۊ، بەخوڎا و بە پیر
شەرت حەیاتم نمەشیم جە ۋیر
گۊش دەر وە عەرزم ڕەفیق شەفیق
مونتەزر پەی شورب شەراب حەقیق
شاباش عومرت زیاڎ بۊ جە سەر
بە حەقی ڕوتبەی پاک پېغەمبەر
منیچ کەم بەندە سەفایی بەردم
وە گۊشت نەچیر، وېم شەهید کەردم.[1]