عەرعەربېزەکەم...
هەرچن ئی شېعرۍ، تەنیا تاریفدای یارېن، هۊردایەن شانو باڵشەرە، بەڵام چەنی دەسەڵاتی شېعری میرزا ئۆلقاڎری نمەگونجیۊ، ئا لەزەتە دلۍ شېعرەکانو میرزا ئۆلقاڎرینە چەشیۊ، چېگە گومەن.
عەرعەر بېزەکەم، عەرعەر بېزەکەم
نەمامی نەوڕەس عەرعەر بېزەکەم
ئاهوی نە ساسڵ سەحەر خېزەکەم
دڵ‌ ڕوبای دڵبەر دڵ ئاوېزەکەم
سەوڵ وەش تەرکیب شیرین‌خاڵەکەم
مەحبوب بۍعەیب شەم جەماڵەکەم
نەزاکەت فرۊش لارە و لەنجەکەم
دەریای مەعریفەت سوخەن سەنجەکەم
کۊگای زەبەرجەد دانەی لاڵەکەم
کان حەیا و شەرم پەڕ کەماڵەکەم
باڵا نەحل ناز، جەمین جامەکەم
گوڵ فام، گوڵ ئەندام، گوڵ کەلامەکەم
گوڵ دەست، گوڵ قامەت، گوڵ ڕوخسارەکەم
شەرتو شۊن درووست وەفادارەکەم
ڕیشەی دڵ پەیکەر، ناز ئەنازەکەم
یەک ڕەنگ، یەک مەقام، یەک مەجازەکەم
توحفەی وەش قوماش دڵپەسەندەکەم
شۊخ نازەنین دیڎە ڕەندەکەم
خاویر خاڵدار خەرامانەکەم
شەفای دەرد دڵ بۍسامانەکەم
ڕەندم، قامەتم، حاڵ‌زان حاڵم
شەمع و پەروانەی شەوچرای ماڵم
سەوڵ وەش‌قامەت یار خەم‌خودارم
تەڵا و ئەشرەفی دانەی مروارم
گەنج و گەوهەرم مایەی توجارم
خەزېنەی شاهان خەروار خەروارم
خاو و خوراکم دیدەم بیناییم
دەوڵەت و ئیقباڵ کەوکەبی شاییم
ساقی کەوسەر و بادەی تەهوورم
تووبا و سەهەندم بەهەشت و حوورم
تەقوا و تاعەتم زیکر و ئەورادم
فیکر و تەماشا و دەرس و ئوستادم
کەسبم کەماڵم ڕەویە و رەوشتم
بوتم، کلیسام، مزگی و کەنشتم
بۍ تۊ زیندەگیم چوون ژار مارەن
پەی دووریت بە خوڎا دڵ بۍقەرارەن
سا تۊ هەی ئازیز هەی شۊخ دڵبەر
ئازاد دنیا و قیامەتم کەر
هۊردارە شاباڵ موژەی مەی پەیکەر
ئازاد دنیا و قیامەتم کەر
یەک جار تیر مەرگ نەتۊی جەرگم بەر
ئازاد دنیا و قیامەتم کەر
یا پەی خەلاسیم دەست بە خەنجەر بەر
ئازاد دنیا و قیامەتم کەر
یا مەڵهەم نەرووی زام سەختم دەر
ئازاد دنیا و قیامەتم کەر
وەرنە جەفای تۊ و بەدکاران یەک‌سەر
نیشان دان پەنەم ئه و ماوای سەقەر
عاشق جە لای دۊس عەشقش موحکەم بۊ
حەیفەن دۊس مەیلش جە لای ئه و کەم بۊ.[1]