فەڵەک باری دەرد...
میرزا ئۆلقاڎر، ئەچی شېعرېنە گلەیۍ جە بەختەو وېش کەرۊن، ئاڎ هیچ عەیبێ و خرابیێ وېشەنە نمەوینۊ، هاوار کەرۊ فەلەکی، تاکەی بارو دەردا بکېشوو؟
ماچۊ: مەر من جە ئوممەتو محەمەدی نییەنا، مەر من چا کەسا بېەنا کە پەیکوڵ(دڕەی)م ڕاو پېخامئاوەرینە شەندەبۊ، مەر من شایەڎییم ڎان پەی ئاڎەمی کە گەنمەش ۋاردە، مەر من پەی کوشتەو قابیلی وېم بەستەن، حەزرەتو زەکەریایم کوشتەن بە مشار، بارە نەوتەم بەردېنە پەی ئایېرو نەمروودی پەی سۊچنای ئیبراهیمی، هیچ گوناحم نییەن، بەشکم خوڎای بەزەییمەڼ ببەخشۊم بە ڕەحمو وېش.
فەڵەک بار دەرد، فەڵەک بار دەرد
تاکەی بکېشوون، جەفای بار دەرد
وەهار دانە تەپڵ، زمستان ۋیەرد
تا کەی جەور دەور، ڕەنگم کەرۊ زەرد
مەر پېت نەیاوان، دەرد و ئاهی من
هەناسان سەرد، سەحەرگاهی من
شین و شەوناڵین، نامرادی من
کزەی کوورەی دڵ، دوور جە شاڎیی من
کزەی دۊزەخ جەرگ، نادیاری من
لوولەی ئستخوان، دەرد کاری من
مەر من جە ئومەت موستەفا سیوام
چوون سکەی برنز قەڵب و ناڕەوام
من پەیکوڵ نەڕای ڕەسووڵ نەشەندم
پەی ئاڎەم نەدام گەواهی گەندم
کارنامە شروع ناما جە دەستم
پەی قەتڵ قابیل کەمەر نەبەستم
جاڕیا سەنەم نەکېشام نە شار
زەکەریام نەکوشت بە مەودای مشار
نەکەردم کوفران نایەرەی عیسا
خەتاکار نەویم وېنەی بەر سیسا
بار نەفت وە نار نەمروود نەپاشام
مەنجەنیق پەی مەرگ خەلیل نەتاشام
ناقەی ساڵحم وە سرقەت نەبەرد
بە ناکاری بورج فیرعەونم نەکەرد
چەنی قەوم لووت مەی نۊشیم نەکەرد
پەی قەتڵ حوسەین سەرکۊشیم نەکەرد
شەرم ڕشتەی هوون ناما وە دامان
فوراتم نەبەست نەڕووی ئیمامان
ڕای کابەم نەگرت نە ڕووی حاجیان
تېغ نەڎام نە فەوق فیرقەی ناجیان
فەڵەک من پەیره و دین نەبی بیم
چەند ساڵ نەپەی دین من مەکتەبی بیم
حەق وېش گەواهەن نمەک شناس بیم
حەکاک مەعروف خاس خەواس بیم
ئەر سزاوارم عیتابم تا کەی
ئەر موسڵمانم عەزابم تاکەی
زانات من قیبلەم ناخاس دینیم
پەی چی مەسازیم پەی چی مەشکینیم
با ڕەحمەت بەیۊ وە جەستەی حاڵم
ناڵەم لېت ۋیەرد تا کەی بناڵم
با جەتی نووری شای خەیرولبەشەر
ببەخشەم بەشەرم شەفیع مەحشەر
تا کەی جەور دەرد بڎۊ ئازارم
نامم (شەفیعەن) سەد شەرمەسارم.[1]