شین پەی محەمەد بەگو وەکېڵی
بەشۍ پەنجەمە
میرزا ئۆلقاڎر، ئەچی بەشەو دماینېیەنە ئیتر وەفاو وېش پەی وەکېڵی جوانەمەرگی بەرمەوزۊن، شەرتە کەرۊن ئیتر دمای وەکېڵی هەرگیز مەیلش نەکەرۊن فەرامۊش، مەولەوی ئاسا:
نەیچی سا لێدەر قەزات وە ماڵم
دەمێ دەر جە نەی دەروون زووخاڵم.
میرزایچ داوامەکەرۊن جە نەیچی پەی نەوایێ، جە موتریبی پەی مەقامێ، جە موغەنی پەی تەرزێ، جە ساقی پەی جامێ، تاکو کەڵافەو خەمیش شانۊ وە پېڵدا، پەی کەرۊن وە شۊن کۊچی وەکېڵدا.
کەی زانی ئەجەل ها له کەمیندا
ناغافڵ مەڎۊت وە ڕووی زەمیندا
هەرەس وەیانەم وەی وە ماڵم وەی
فەڵەک نەمامی چوون تۊش کەردەن پەی
وەگیانت وەکېڵ، میر گەردەن زەرد
دنیات بە بۍ وېت پەی من تاریک کەرد
تامانۊ جە لام زەڕەی عەقڵ و هۊش
شەرتەن مەیلەکەت نەکەم فەرامۊش
تا شەمع ئەروام خاس نەبۊ خامۊش
شەرتەن مەیلەکەت نەکەم فەرامۊش
تا چەم چوون چەمەی شەتاو نەڎۊ جۊش
شەرتەن مەیلەکەت نەکەم فەرامۊش
تا چوون تۊ بادەی ئەجەڵ نەکەم نۊش
شەرتەن مەیلەکەت نەکەم فەرامۊش
پەی چېش قەزای تۊ حاڵ‌زان حاڵم
نەکەوت جە ناگاە بە وېم و ماڵم
سا من وە بۍ تۊ مەبۊ چېش کەروون
داد دەرد دڵ وە لای کۍ بەروون
بەخوڎا گوشاهی جەلام نەمەندەن
بەدتەر جە قەقنەس دڵ ئایېر سەندەن
نەیچی نەوایە، موترب مەقامێ
موغەنی تەرزێ، ساقیا جامێ
پەی کەڵافەی خەم شانۊ وە پېڵدا
هەی کەروون وەشۊن کۊچ وەکېڵ‌دا
یاران دوعاکەن وەشی هەر تار بۊ
جە دمای وەکېڵ دنیا قەهار بۊ
گوڵان بەرنەیان نەتۊی خاک خەم
با هەر عەدەم بان تا یەومولعەدەم
داران نەکەران شکۊفەی ساڵان
ماتەم بان چوون دڵ دەروون زوخاڵان
هەنی جەیدما جەی دنیای باڎیی
نەکەران خەیاڵ یاران پەی شاڎیی
بزورگان نەکەن شکار چوون جاران
نەپېکان کەڵ‌ڕەم نەپای موغاران
نە شنۊی شەماڵ سەر دیاران بۊ
نە دەنگ هات هات میرشکاران بۊ
نە دایەری سۊز نە جاگوداز بۊ
نە گرمەی دەهۊڵ نە سەدای ساز بۊ
هەردان وېنەی من خەریک خەم بان
با گشت پەی وەکېڵ یەکسەر ماتەم بان
سەفای نەو وەهار با گشت بەتاڵ بۊ
نە سەیر سارا نە سیاماڵ بۊ
جە دمای وەکېڵ شای وەش‌ دەماخان
کەس نەشۊ وە سەیر تەماشای باخان
سابا خاڵ‌خاسان گشت زووخاو نۊش بان
تا قام قیام هەر سیا پۊش بان
عالەم با شین بۊ جە گردین لاوە
نەمانۊ شاڎیی وەڕووی دنیاوە
سا چوون ئاغەکەم جەی دنیای فانی
نەوەردت میوەی باغ جوانی
چەرخ چەپی واز کەچ گەرد ناشاد
چوون فەرهاد ڕەنجت یەکسەر دا وەباد
هومېدەن بە زات دەهەندەی داوەر
ببەخشۊش وە نوور پاک پېخامبەر
جەنات و تەجری جاویدان جات بۊ
«ڕزوان و اعلا» فردەوس نە پات بۊ
بگېڵی بە شاڎ نە باغچەی بەهەشت
چەنی حۊریان بکەری گوڵ‌گەشت
وەشاڎیی و شکار جە ڕوزگاران
وە عومر و ئیقباڵ دنیا بویاران
تاریخ تەسنیف بەندەی دەروون کېڵ
مەرسیەی مەرحوم وەفات وەکېڵ.[1]