نووری، شاعېرێ سەردەمو میرزا ئۆلقاڎری بېیەن، دیارەن دۊسایەتیشان وەش بېیەن، جە نامە شېعریێنە پەی میرزای، داواش وەنەکەرۊن کە سەردایش کەرۊ، چوونکم شاهەنشاو شاڎییش ماتەن، بە ئامای میرزا ئۆلقاڎری، مېمانداریێ دۊسانە، واتەو گۊشگېرتەی ڕەفېقانە، ڕېزەی ڕازانو میرزای شیفان پەی زامانیش.
میرزام وەفاتەن میرزام وەفاتەن
قەدەم ڕەنجەکەر واڎەی وەفاتەن
شەهنشای شاڎییم مات ناماتەن
بوت‌پەرست ئاسا ئەروام جە لاتەن
جە حوجرەی سەراو کەی مەبی ڕاهی
چەند مەمدرۊ ماه نە بورج ماهی
واڎەی ئاماتەن ئامان سەد ئامان
ڕېزەی ڕازانت شفان پەی زامان
سا باوەر تەشریف هەی بەرگوزیدە
بە جای مەردومەک جا گیر نە دیدە
وەرنە ها تەمام نایەرەی دووری
کەرد وە کۊی نوورە سەرتاپای (نووری) .[1]