هەرچەندە کۆبوونەوەی ئەمڕۆی #17-04-2023# شاندەکەی حکومەتی هەرێمی کوردستان و #قوباد تاڵەبانی# ڕاوێژکاری بووە لەسەر نیگەرانییەکانی یەکێتی لە حکومەت، هاوکات شاندەکە داوای کردووە بگەڕێتەوە بۆ کۆبوونەوەکانی ئەنجوومەنی وەزیران، کە لە کۆتایی ساڵی ڕابردووەوە بایکۆتی ڕاگەیاندوە.
شاندەکەی حکومەت دوو پێشنیارێکیان داوەتە قوباد تاڵەبانی، لەوانە خۆی و تیمەکەی بگەڕێنەوە بۆ کۆبوونەوەی ئەنجوومەنی وەزیران یاخود تیمەکەی کە پێکدێت لە شەش وەزیر بگەڕێنەوە بۆ کۆبوونەوەی ئەنجوومەنی وەزیران، بەڵام نیگەرانییەکانی یەکێتی بە جۆرێکە ئەگەرێکی کەم هەیە کە تیمی یەکێتی بگەڕێتەوە بۆ کۆبوونەوەی ئەنجوومەنی وەزیران.
کۆبوونەوەکە نزیکەی سێ کاتژمێری خایان و لە بینای مەکتەبی سیاسی یەکێتی لە #هەولێر# بەڕێوەچوو، پێدەچێت لەدوای جەژنی ڕەمەزان کۆبوونەوەیەکی دیکە لە ئاستی باڵادا بەڕێوەبچێت. [1]