سێ وەزیری حکومەتی هەرێمی کوردستان بە نوێنەرایەتی حکومەت سەردانی #قوباد تاڵەبانی#، جێگری سەرۆک وەزیران دەکەن و لەبارەی نیگەرانییەکانی و گەڕانەوەی بۆ کۆبوونەوەکانی ئەنجوومەنی وەزیران گفتوگۆ دەکەن و کۆبوونەوەکەش لە مەکتەبی سیاسی یەکێتی بەڕێوەدەچێت.
هەرچەندە بڕیاربوو ڕۆژی شەممەی ڕابردوو #08-04-2023# سەردانی شاندەکە بۆ لای قوباد تاڵەبانی ئەنجامبدرێت، بەڵام کۆبوونەوەکە بۆ ئەمڕۆ دووشەممە #17-04-2023# دواخرا، کە لە کۆبوونەوەی ڕۆژی چوارشەممەی ڕابردوو بڕیاری لێدراوە بۆ ئەوەی هەوڵەکان بۆ گەڕاندنەوەی قوباد تاڵەبانی و تیمی یەکێتی بۆ ئەنجوومەنی وەزیران چڕبکرێتەوە.
ئەو شاندەی کە بۆ سەردانکردنی قوباد تاڵەبانی پێکهێنراوە، پێکهاتوون لە #پشتیوان سادق# (لە تیمی پارتی) ، #دانا عەبدولکەریم# (لە تیمی گۆڕان) ، عەبدوڵڵای حاجی مەحمود (لە تیمی سۆشیالیست).
هەرچەندە دیارنییە قوباد تاڵەبانی بڕیاری گەڕانەوە بۆ کۆبوونەوەکانی ئەنجوومەنی وەزیران دەدات یاخود نا، بەڵام ڕووداوەکانی هەفتەی ڕابردوی #سلێمانی# جارێکی دیکە پەیوەندی تیمی یەکێتی لەگەڵ پارتی تێکدا و ئاسۆی نزیکبوونەوەی هەردوو حزبی بۆ گەڕانەوە بۆ مێزی گفتوگۆ دورخستنەوە.
بەهۆی ناکۆکییەکانیان لەگەڵ پارتی و #مەسرور بارزانی# لە #26-10-2022# قوباد تاڵەبانی، جێگری سەرۆک وەزیران و وەزیرەکانی یەکێتی بایکۆتی کۆبوونەوەکانی ئەنجوومەنی وەزیرانیان کردووە، بەڵام خۆیان دەڵێن، لە ڕاییکردنی کارەکانیان لە وەزارەتەکان بەردەوامن. [1]