چناری هەوڵی
بەشۊ ششەمۍ
چنارو هەوڵی، توولانیشدا بە باسەکەیش، بە گېڵنایۆ تاریخی ۋەڵینی پەی میرزا ئۆلقاڎری، سەردەم یاوا بە (ئەسکەڼەری) ، دماتەر (دارا) براو ئەسکەڼەری دەسەڵاتش گېرتەن دەس، گرمەو کەڕەنایش وە گەردوون ۋیەرد، دمای (دارا) ی، چن پاشایێ تەر جە بنەماڵەو کەیانی دەسەڵاتشان گېرتەنە دەس، تاکو یاوا بە دەسەڵاتو (قوبادی سانی) ، دمای قوبادی یاوا بە (نەوشیروانی) ، پاشێوە داڎوەر، خاستەر چەویشا، چڼەها تاقۍ کیسرێش وەشکەردۍ، سەردەمو بڵېسەو ئایېرو زەردەشتیەکا بۍ، هەرچا زەمەنەنە شای بوراق سوار (محەمەد) ئاما نە ڕووی دنیا.
میرزام من عومرم خەیلێ ۋیەردەن
سەیر دەورانم فەراوان کەردەن
ئەو وەختە ئەیام شای ئەسکەندەر بۍ
قامەتم وېنەی فتیڵە کەر بۍ
خوڎاوەند کارێ کەردەبۍ خڎېم
هەرساڵ خەردەڵێ باڵا مەدا پېم
بەڵۍ جەو دەمدا دارای بن داراب
برای ئەسکەندەر نادرەی نایاب
ئاڎییچ هەم چەندێ پادشاهیی کەرد
گرمەی کەڕەناش جە گەردوون ۋیەرد
ئاخر ئەو دارای دارایی پۊشە
ئەو شېر پەڕ زات ئەژدەر خرۊشە
جە ناگا فەڵەک چەرخ سەهمناک
سەلتەنەی شاهیش کېشا وە ژېر خاک
جەو دما چن کەی، چن شای کەیانی
تا یاوا وە دەور قوباد سانی
قوباد، هەم شەربەت مەماتش کەرد نۊش
سەلتەنەی شاهیش گرد بی فەرامۊش
جە نەسڵ قوباد سلسلەی کەیان
شاهیی هەم یاوا وە شای نەوشیروان
شمشېری حوکمش بەست نە ڕووی کەمەر
خاستەر جە شاهی دارا و ئەسکەڼەر
دەسکەرد وە بەخشش مەزڵووم‌ نەوازی
وە عەتا و کەرەم ڕای خەیرات سازی
زەنجیر زەڕین چوون خەیاڵ ۋېش
کېشا پەی خەبەر مەزڵووم و دەروېش
دوو ساعەت بېشتەر توول ئەو زەنجیر
مەزڕیا چوون زەنگ لەرزانە و لاگیر
ئاواز عەدڵش جە گەردوون ۋیەرد
فەڵەک پەی عەتاش چن ئافەرین کەرد
شش تاق کیسراش وە ئەوج بەردەبۍ
ساراش وېنەی هەشت بەهەشت کەردەبۍ
نامی زوردەشتش دۊزەخ نیابۍ
چوونکە بڵېسەش داېم وە پا بۍ
بەڵۍ ۋەی دەستوور نەوشیروانی کەرد
ڕازەن جە دنیا یەکسەر فانی کەرد
جەو دەمدا سەیید شای قابە قەوسەین
جەناب حەزرەت شەهنشای کەونەین
مەحبووب بېعەیب پادشای ئەکبەر
سالار دیوان عەرسەگای مەحشەر
شاسوار عەرش لامەکان تەی کەر
بەند ڕیشەی جەرگ دوشمنان پەی کەرد
ناجی عەداڵەت دیوان حەق‌کەر
وە ئیشارەی کلک ڕووی قەمەر شەق کەر
مەزڵوومان وە لوتف بېپایان شاڎکەر
عاسیان جە نار دۊزەخ ئازاڎ کەر
قەتع سەرچەشمەی ئاو ساوا کەر
وە نیم‌ نیگای مەیل بەهەشت ئاوا کەر
شش تاق ئەیوان کیسرا خاپوور کەر
گڕەی توڕەی نار زوردەشت بۍ نوورکەر
سا من چېش واچوون فڎای نامش بام
وە فڎای شېوەی ڕەنگ، سایەی سامش بام
جە عەسر ئەیام ئەو شای لاڵ کەمەر
پېڎا بی حەزرەت شای (خیرالبشر)
یانی موحەممەد موستەفای ئەمین
نوورش ئەفشان بی نە ڕووی سەرزەمین
بەڵام نەوشیروان جه و دەم تەشریف بەرد
ڕۊحش وە ڕەحمەت کۊچ خەیرش کەرد
باز هورموز نەجای شاهنشای نیک‌بەخت
وە سەڎ شاڎیی و زەوق نیشت وە بان تەخت
هەم بشین وە سەر حەبیب سەروەر
ئەوساف حەزرەت خاتەم پېغەمبەر
کەم کەم تاکو سنعش یاوا دە ساڵە
ئەعجازش مەبەر کافران زاڵە
سەنگ مەکەرد وە ئاو، ئاو مەکەرد وە سەنگ
خاک مەکەرد وە چۊ، چۊ ماوەرد وە دەنگ
عومری شەریفش وە یازدە یاوا
جە شوعلەی نوورش مەککە بی ئاوا
هەر کەسێ مەدیش مەزانا وېشەن
حوکم ئەوەڵین ئاخرین پېشەن
سا سەر وە فڎای خاشاک پاش بۊ
ڕۊحم وە سەرگەرد ئاما و لواش بۊ
ئەوەڵ جە یاران سدیق ئەکبەر
مەحرەم وە ئەسرار ڕاز پېغەمبەر
سانیەن عومەر شەجیع فاروق
شای ئیبن خەتاب سالار سەر تەوق
سېهەم زینورەین شای شیرین قەڵەم
جامعەلقورئان خەڵات خاتەم
چوارەمین حەیدەر شای دڵدڵ سوار
شېر خوداوەند ساحیب زوڵفەقار
سوجدەی غوڵامی وە حەزرەت بەردەن
حوکم ئەحمەدی ئاشکار کەردەن
باقی ئەسحابان کەمەربەند گوزین
تا شین وە خزمەت فەخرەلعالەمین
نە دەورە حەزرەت سپا ۋناران
چوون قەمەر نەبەین حەڵقەی ستاران
کۊس حوکم ئەو نە عالەم ژەندەن
خوتبەی سالاریش نە شاران وەندەن
ئەوەڵ جار وە نوور مەککەش ئاوا کەر
جەو دما تەشریف وە مەدینە بەرد
سەیلات لوتفش وە دنیا وارا
سککەی شەریفش یاوا بوخارا
وە حوکم فەرمان تاک تەنیای فەرد
دنیای دوون تەمام گرد موسەخەر کەرد
جەو دەم شای هورموز تەختش خاڵی کەرد
تاج بەهمەنیش وە خسره و سپەرد.[1]