بنەچەو بەگزاڎەکا هۆرامانی
بەشۊ دواڼزەهەمۍ
ڕەزا سان:
سانێ نامڎار و فرە ئازا و ئەشناسیا بییەن، نەخشێ فرەش سەرو قومیاکا ناوچەکەیۆ بییەن، ساڵەو (1170ک/ 1756ز) دمای کوشتەی خالید سانی بە دەسو (حەیدەر بەگ) ی، بەڵام دمای شش مانگا جە کوشتەیش، محەمەد بەگی براش هەقەش مسانۊو حەیدەر بەگی کوشۊن، بە یاوای هەواڵو کوشیای حەیدەر بەگی بە پاشاو بابانی، فەرمانو (سانیی هۆرامانی) پەی (ڕەزا سان کوڕو حسێن بەگ کوڕو بارام سانی یەکەمی کوڕو عەباس قولی سانی) بەرکەرۊن، هەر چا وەختەنە (خەسرەو خانی ۋالی) کە بە فەرمانو (حەمە حەسەن خانو قاجاری) بە ۋالی کوردەسانی دیاریکریابۍ، فەرمانو حوکمڕانی سەراسەری هۊرامانی بە نامۍ (ڕەزا سان) ی بەرکەرۊن.
مەلا عەبدولڵای قازی نویستەنش:
(ڕەزاسان) پیێوە خاوەن شەهامەت و دیندار و فرە شارەزا جە ۋردەکاریەکا حوکمداری بییەن، سەروەختو دەسەڵاتیشەنە خەڵکو هۆرامانی وەشگوزەرانۍ بیېنۍ، ناوچەکەیچ ۋەڵکۆتەیش پۆ وېشۆ دییەن، هەرزانی ۋەڵابېیەنۆ، پەی نموونەی: هۊقێ ڕوۋەن دریان بە نۊ شایۍ، هۊقێ لۊکە دریان بە یەرۍ عەباسیۍ، ئېتێ کڵاشۍ پیایانۍ بە یەرۍ شایۍ، هەقدەسو ۋراستەی کەوای پیایانەی یەک شایی و ژەنانەیچ دۋۍ شایۍ، کەس نەیارانش گرانۋرەشی کەرۊن، سەردەمو ئی سانەینە خەڵکە بۍ ماواکۍ، هەژارەکۍ، پیرەکۍ، دلۍ مزگیەکانە ۋێکریێنۍ و پۊشاک و پاپۊششا دێنۍ پەنە.
فرەو بەگزاڎەکۍ هۆرامانی چەنی خەڵکو ناوچەکەی بە ڕېک و پېکی جمێنێ، کەسشان زوڵم و ستەمشان نەکەردەن، چڼین کارۍ خێرۋازیېشا کەردېنێ، پەی نموونەی:
(مۇمن خان) مزگی دەگاو (نەروۍ) ش ئاوەڎان کەردەنۆ، (حەمە تایەر بەگ) پردەو عەباس ئاوایش تازۍ کەردېنۆ، بە فەرمانو (ڕەزا سان) ی دوۍ پردۍ تەر جە (شامیان) وەشۍ کریێنۍ، گردو ئا زارۊڵا کە بۍ ئەڎا و تاتە بیېنۍ ڕەزاسانی ۋێکەردېنۍ، ساڵانە چڼەها تەغارۍ (خەلە و یەوۍ و چەڵتووک) تۆزېعۍ خەڵکە هەژارەکاش کەردېنۍ، پەوکەی جە لاو ۋالیەکا کوردەسانی و هەم جە لاو پاشاکا بابانیۆ قەدرش گېریان.
(ڕەزاسان) دمای ۋیس و پەنج ساڵا حوکمڕانی، ساڵەو (1197ک/ 1782ز) سەفەرو قەڵاچوالانینە نەۋەش کەوتەن و هەر چاگەیچ وەفاتش کەردەن، سەرو وەسیەتو وېش تەرمەکەش ڕەوانەو هۆرامانی کریانۆو جە گۊڕستانو محەمەڎی غەیبینە ئەسپەردە کریان.[1]