واتەو گۊشگېرتەی مېیانو ئاسمانی و زەمینی
بەشۊ چوارەمی
زەمین قینیېنه ئاماوە گوفتار، دیاۋە سەرۆکووی پەی ئاسمانی، ماچۊ: ئیتر تەنز وەسېن، ۋاران ۋارنای مڎەیۆ ڕوەمارە، ئانە کارو خالقیەن، جە خەزانەو ۋېش مجۊشەرە پەیمان، ئاخر تۊ بېجگە مانگ و ۋەرەتاوی، چېشت هەن بنازیش پۊرە؟
من یاگەی چڼەها (مایجەمینانا) ، هەریۊشان ماهێوەن پەی وېش، چڼەها پیرۍ نوورانیۍ ئینێ سەرو منۆ، دڵو هەر یۊشان خورشیدێوەن پەی ۋېش.
دیسان هەم زەمین ستیزا بە تاو
شەق شەق بی جە قین ئاماوە جواو
وات هەی ئاسمان بەرزی پەڕ خەیاڵ
تەنز تۊ تاکەی وەسەن تانەی تاڵ
مەعلووم بۊ جە لات ئەر خرەدمەندی
هەنی نەڎەی لاف جە خود پەسەندی
ئاخر وە تۊ چېش شوعلەی ماه و خۋەر
یا سەیل ڕەحمەت پادشای ئەکبەر
خالقی هەور و سەیلات ۋاران
چەنی ماه و خور باقی ستاران
جە خەزانەی غەیب نە پەشت پەردەن
پەی بەنی ئاڎەم گرد ئیجاڎ کەردەن
هەق زات ئاڎەم ۋېش کەردەن سەنا
جە (تفصیل) (نصّ) ئایەی (کَرَّمنا)
جارێ چی وەرتەر شۊڵەی ماه و خۋەر
پەرۍ فەزڵ وېت وە دەس پېچ مەکەر
منیچ چن هەزار (مایجەمین) داروون
چن خورشیڎ پاک نازەنین داروون
چن پیر ڕەهبەر ڕاگەی دین داروون
چن خوڎاوەندان سەرزەمین داروون
هەر یەک نە جای وېش بېشک ماهێوەن
قەمەر جە لاشان پەڕە کاهێوەن
ئەی حەرفە نە عام عاڵەم عەیانەن
قەلب موئمنان عەرش ڕەحمانەن
غەیر جە ماه و خور مەشهوور عامەن
ئاسمان هەنی، فەزڵ تۊ کامەن.[1]