بنەچەو بەگزاڎەکا هۆرامانی
بەشۊ ویس و یەکەمۍ
فەرهاد میرزا و عەلی ئەکبەرخان و کوشتەی حەمەسەعیدسانی:
پیلانەو کوشتەی حەمەسەعیڎسانی و کوڕەکاش، جە دەربارو ویلایەتو کوردەسانینە، چېرو سەرەو (فەرهاد میرزای و عەلی ئەکبەر خان) ینە مجیێبېرە، پی تەرزە:
بە نیازو گېڵنایۆ حەمەسەعیڎسانی و خانەوادەکەیش و دەسوپېوەڼەکەیش پەی سەرو دەسەڵاتی، حەمەسەعیدسان چەنی (عەلی ئەکبەرخان) ی جە شارو سنەیۆ گېڵێوە پەی جوانڕوی، هامکات پېخامشا کیاست شۊنەو (ئەوڕەحمان بەگ کوڕو سانی) کە ۋېش بېیاونۊ عەینو یاگۍ، بە حیساب دمای چن ڕوێ بە حورمەتۆ مەگېڵناشاوە پەی (نۆسوڎۍ) پەی حوکمداری وېشان، عەلی ئەکبەرخان پېسە هەر خائینێ ئەڵقەگۊشی پی تەرزە باس چا پیلانۍ کەرۊن:
بە درېژایی ڕاو گېڵایۆمان جە (سنە) پەی (جوانڕو) ی، بېتاقەتیێ فرە بە (حەمەسەعید سان) یۆ دیاربۍ، جاری پاسنەبۍ گنۍ ۋەڵېما، جاری چامنەیچ بۍ گنۍ شۊنیما، وەختێ یاوایمۍ جوانڕو، پەنەم وات کۊگەت پەنەوەشەن و دڵت پۆن نیشەرە، دمای یەرۍ ڕوۋا مەنەیۆ، سەرو ئانەیە ڕېکۍ کەوتیمۍ کە مەنەیۆ جە جوانڕو هیچ سوودێش نېیەن، هەر ئا شەوە عەلی ئەکبەرخان کیاستش شۊنەو (سەیفوور بەگ) ی کە جاگیریش بۍ، ۋردەکاری پیلانەکېش پەی باسکەرد، چەنی یاوارەی سفرەو نانو ساعبی، پیلانە قیزەۋنەکېشا دەقاو دەق جابەجا کەردە، (حەمەسەعیدسان) بە تېغ، (میرزابابەکر) دەمڕاسو سانی و ئەوڕەحمان بە گرۊڵییە کۊشیێ.[1]